Қазақ футболының жас жұлдызы, “Қайрат” клубының вингері Дастан Сатпаев әлем назарын өзіне аударды. Ол 17 жасқа толмаған футболшылар арасындағы ең қымбат үш ойыншының қатарына енді, деп хабарлайды Shalqar.kz.

Transfermarkt сайты жариялаған жаңа рейтинг бойынша, Сатпаевтың трансферлік құны — 1,8 миллион еуро. Бұл көрсеткіш бойынша ол әлемдік рейтингте 3-орында тұр. Дастан — бұл тізімге енген жер жүзіндегі жалғыз қазақстандық футболшы.

Жас таланттардың үздік үштігі:
 1. Хильберто Мора (Мексика, “Тихуана”) – 3 млн еуро
 2. Натан Де Кат (Бельгия, “Андерлехт”) – 2,5 млн еуро
 3. Дастан Сатпаев (Қазақстан, “Қайрат”) – 1,8 млн еуро

Жанкүйерлерге еске сала кетсек, 2025 жылдың ақпанында “Қайрат” Дастанның ағылшындық “Челси” клубына сатылғанын ресми мәлімдеген болатын. Алайда ол 18 жасқа толғанша “Қайрат” сапында өнер көрсетуді жалғастырады.

Биылғы маусымда небәрі 16 жастағы Сатпаев Премьер-лигада 13 матч өткізіп, 8 гол соғып, 4 нәтижелі пас беріп үлгерді. Бұл көрсеткіштер жас ойыншы үшін – ерекше нәтиже!

Бұған дейін де Сатпаев Қазақстан Премьер-лигасының ең қымбат ойыншысы атанған болатын. Енді ол әлем аренасында да өз орнын дәлелдеп отыр.