Қазақстандық теннисші Зарина Дияс Испанияның Таусте қаласында өткен ITF W35 деңгейіндегі турнирде топ жарды. Бұл — жарақаттан кейін үлкен спортқа оралған спортшының биылғы үшінші жеңісі, деп хабарлайды Shalqar.kz.

Әлемдік рейтингте 275-орында тұрған Зарина жарыстың фавориттерінің бірі ретінде тіркелді. Финалға дейінгі барлық қарсыласын сенімді жеңіп шыққан ол шешуші матчта италиялық Дилетта Керубинимен (№446) кортқа шықты.

Бірінші партияда Дияс қарсыласын қыспаққа алып, 6:1 есебімен жеңіске жетті. Екінші сетте де басымдық байқалды: 5:3 есебімен алда келе жатып, қарсылас есепті теңестіріп, тай-брейкте басым түсті — 7:6 (7:4). Алайда шешуші үшінші сетте Зарина еш мүмкіндік қалдырмай, 6:1 есебімен жеңісті өз қолына алды.

Екі сағатқа созылған бұл матч – Диястың спорттағы табандылығының жарқын дәлелі. Екі жыл үзілістен кейін 2024 жылы қайта оралған теннисші осылайша үшінші рет ITF турнирінде жеңімпаз атанып отыр.