1 шілдеден бастап Қазақстанда ата-анасының қамқорлығынсыз қалған балаларды уақытша отбасылық ортаға орналастырудың жаңа форматы – кәсіби қабылдаушы отбасы моделі енгізілді, деп хабарлайды Shalqar.kz.

Бұл жүйе балаларды интернатқа емес, бірден дайын, арнайы оқудан өткен отбасыларға тапсыруға мүмкіндік береді. Әрбір мұндай отбасы 4 балаға дейін тәрбиелеуге құқылы. Тәрбиешілер міндетті түрде арнайы дайындықтан өтеді, ал балаларды қабылдау туралы шешімді қамқоршылық органдары қабылдайды.

Басты артықшылық – баланың психологиялық күйзелісін азайту және оны жылылыққа толы отбасылық ортада тәрбиелеу. Мұндай тәрбиешілерге жәрдемақы мен еңбекақы да қарастырылған.

Бүгінде елімізде балаларды отбасына орналастырудың 4 формасы бар: асырап алу, қамқоршылық, патронат және қабылдаушы отбасы. Енді соған кәсіби қабылдаушы отбасы қосылды.