Көкшетау қаласында ерекше қажеттіліктері бар жандар үшін заманауи оңалту орталығының құрылысы жүріп жатыр. 150 орындық кешен «AMANAT» партиясы мен Президент бастамасы аясында салынуда, деп хабарлайды Shalqar.kz.

Орталық жылына 1500-1800 адамға медициналық және оңалту қызметтерін ұсынуға қауқарлы. Ол тәулік бойы қызмет көрсетіп, барлық қажетті жағдаймен жабдықталады.

Құрылыс «Сарыарқа» шағынауданында орналасқан. Аумағы – 12 мың шаршы метрден асады. Бірақ жобаны қайта қарау мен қаржыландыру қиындықтарына байланысты орталық тек 2027 жылы пайдалануға беріледі.

«AMANAT» партиясының айтуынша, мұндай орталықтар ерекше жандардың өмір сапасын арттырып, қоғамға бейімделуіне үлкен мүмкіндік береді. Партия жобаның кешігуіне кінәлілерді жауапқа тартуды талап етуде.

Сонымен қатар, партияның «Кедергісіз келешек» бағдарламасы аясында облыста 1000-нан астам нысан жаңартылып, тағы 176 нысан бейімделеді. Мектептерде инклюзивті білім, инватакси, тегін жол жүру мүмкіндігі де қолға алынған.