الەمدىك تەحنولوگييالىق الپاۋىت Microsoft شامامەن 9 000 قىزمەتكەرىن جۇمىستان بوساتا باستادى. بۇل — شىعىنداردى ازايتىپ, قۇرىلىمداردى قايتا قۇرۋعا باعىتتالعان شەشىم, دەپ حابارلايدى Shalqar.kz.

كومپانييا مالىمەتىنشە, قىسقارتۋ بۇكىل قىزمەتكەرلەر سانىنىڭ 4%-دان ازىن قامتيدى. بۇل ۇدەرىس تۇرلى بولىمدەر مەن ەلدەردە جۇزەگە اسادى. بۇعان دەيىن Bloomberg اگەنتتىگى Microsoft شىلدە ايىندا, سونىڭ ىشىندە Xbox بولىمىن دە قامتي وتىرىپ, ۇلكەن قىسقارتۋلار جاسايتىنىن حابارلاعان بولاتىن.

بيىل مامىر ايىندا كومپانييا 6 000 قىزمەتكەرمەن قوشتاسقان ەدى, ولاردىڭ كوبى ونىم مەن ينجەنەرييا سالاسىندا قىزمەت ەتكەن.

2024 جىلدىڭ ماۋسىمىنداعى دەرەك بويىنشا Microsoft-تا 228 000 ادام جۇمىس ىستەيدى, ونىڭ ىشىندە 45 000-ى ساتۋ مەن ماركەتينگ بولىمدەرىندە.