Камчатка түбегіне жақын маңда 8,5 балдық жер сілкінісі тіркеліп, бұл соңғы онжылдықтағы ең қуатты дүмпу ретінде бағаланды. Бірқатар елдерде цунами қаупі туралы ескерту жарияланды, деп хабарлайды Shalqar.kz.

Ресей ғылым академиясының геофизикалық қызметі зілзала ошағы жағалаудан 161 шақырым қашықтықта, 32 шақырым тереңдікте орналасқанын мәлімдеді. Бастапқыда 7,5 балл деп бағаланған дүмпу кейін 8,5-ке дейін нақтыланды. Еуропа-Жерорта теңізі сейсмологиялық орталығының мәліметінше, кейінгі дүмпулер 7,0 және одан төмен баллмен тіркелді.

Қауіпсіздік шаралары күшейтіліп, жағалауда цунами болуы мүмкін деген болжаммен тұрғындарға суға жақындамау ескертілді. Камчатка губернаторы Владимир Солодов бұл дүмпудің әлеуметтік маңызы бар нысандарға әсерін анықтау үшін мектептер мен балабақшаларды тексеру басталғанын хабарлады. Бір балабақшада қабырға құлағанымен, ғимаратта бала болмаған.

Сахалин мен Жапонияда да цунами қаупі жарияланып, халық қауіпсіз аймақтарға көшірілді. Әлеуметтік желілерде табиғи апаттың сәттері бейнеленген видео мен суреттер тарап жатыр.