الماتى قالاسىنداعى ماڭىزدى سپورت كەشەندەرى — «حالىق ارەنا» مەن «اتلەتيكالىق اۋىلعا» جوندەۋ جۇمىستارى جۇرگىزىلەدى, دەپ حابارلايدى Shalqar.kz.

وتكەن جىلى «حالىق ارەنا» مەملەكەت مەنشىگىنە قايتارىلعان بولاتىن. قازىرگى تاڭدا بۇل كەشەندى «الماتى قالاسىنىڭ سپورتتىق عيماراتتارى ديرەكتسيياسى» جشس سەنىمگەرلىك باسقارۋعا العان. ەندى مەكەمە كەشەندە اعىمداعى جوندەۋ جۇمىستارىن جۇرگىزۋدى جوسپارلاپ وتىر.

مەملەكەتتىك ساتىپ الۋ پورتالىندا جارييالانعان لوتقا سايكەس, جوندەۋ جۇمىستارىنا 43 467 244 تەڭگە بولىنبەك. مەردىگەر:

 • قابىرعالارداعى جارىقتاردى جوندەپ, بوياۋ جۇمىستارىن جۇرگىزەدى;

 • كيىم اۋىستىراتىن جانە جۋىناتىن بولمەلەردى قالپىنا كەلتىرەدى;

 • مۇز جيناۋعا ارنالعان ارنايى شۇڭقىرلارعا گيدرووقشاۋلاۋ جاسايدى;

 • پاندۋستار مەن باسپالداقتاردى جاڭارتادى.

جوندەۋدەن كەيىن مەردىگەر مەكەمە ەكى جىلدىق كەپىلدىك بەرۋگە مىندەتتى.

سونىمەن قاتار, نۇركەنت 5/11 مەكەنجايىنداعى «اتلەتيكالىق اۋىل» دا جاڭارتۋدان وتەدى. بۇل نىسان 2017 جىلعى ۋنيۆەرسيادا قارساڭىندا سالىنعان بولاتىن. جوندەۋگە 42 841 234 تەڭگە بولىنىپ, بولەك لوت رەتىندە جارييالاندى.

الماتىلىق سپورت نىساندارىنىڭ جاڭارتىلۋى قالا تۇرعىندارى مەن سپورتسۇيەر قاۋىم ۇشىن ۇلكەن مۇمكىندىك بولماق.