12 قازاننان باستاپ ەۋروپالىق وداققا باراتىن تۋريستەر شەكارادان وتۋ كەزىندە جاڭا تارتىپكە تاپ بولادى. بۇل كۇنى ەو ەلدەرى داستۇرلى پاسپورتقا مور باسۋ جۇيەسىنەن باس تارتىپ, ونىڭ ورنىنا بيومەترييالىق دەرەكتەردى تىركەۋگە ارنالعان كىرۋ/شىعۋ جۇيەسىن (EES) ىسكە قوسادى. جۇيە ەو-عا كىرمەيتىن ەلدەردىڭ ازاماتتارىنا قولدانىلادى, دەپ حابارلايدى Shalqar.kz.

EES ارقىلى ساياحاتشىلاردىڭ بەت-بەينەسى مەن ساۋساق ىزدەرى ارنايى سكانەردەن وتكىزىلەدى. بۇل دەرەكتەر ۇش جىل بويى ساقتالادى دا, كەيىن اۆتوماتتى تۇردە جويىلادى. پروتسەدۋرادان باس تارتقان ادامدارعا ەو اۋماعىنا كىرۋگە رۇقسات بەرىلمەيدى. جاڭا جۇيە كيپر مەن يرلاندييادان باسقا بارلىق ەو ەلدەرىندە جانە شەنگەن ايماعىنا كىرەتىن يسلاندييا, ليحتەنشتەين, نورۆەگييا مەن شۆەيتسارييادا قولدانىلادى.

بۇل جاڭاشىلدىق 2026 جىلدىڭ سوڭىندا ىسكە قوسىلاتىن ەۋروپالىق اقپاراتتىق جانە ساپارعا رۇقسات بەرۋ جۇيەسىنە (ETIAS) دايىندىق رەتىندە ەنگىزىلۋدە. ETIAS بويىنشا, ەو-عا كىرمەيتىن ەلدەردىڭ ازاماتتارى ساپار الدىندا 20 ەۋرو كولەمىندە الىم تولەپ, الدىن الا رۇقسات الۋى تيىس بولادى.