Пәкістанның солтүстігінде нөсер жауын салдарынан болған жойқын су тасқыны жүздеген адамның өмірін қиды. Соңғы мәліметке сәйкес, қаза тапқандар саны 330-ға жеткен, деп хабарлайды Shalqar.kz

Geo News дерегінше, бір түн ішінде іздестіру-құтқару топтары көшкін мен сел қиратқан үйлердің астынан ондаған адамның мәйітін тапқан. Хайбер-Пахтунхва провинциясында 307 адам, Гилгит-Балтистанда 12, Азад Кашмирде 11 адам қаза тапты.

Билік 32 тұрғынның әлі күнге дейін із-түзсіз жоғалғанын хабарлады. Сондай-ақ аймақта нөсер жаңбыр 21 тамызға дейін жалғасады деп күтілуде.

Премьер-министр Шахбаз Шариф шұғыл түрде дәрі-дәрмек, азық-түлік және басқа да қажетті көмекті зардап шеккен аймақтарға жеткізуді тапсырды. Бұған дейін қаза тапқандар саны 194 адам деп хабарланған болатын.