1 قىركۇيەكتەن 1 قاراشاعا دەيىن ەلىمىزدە حالىقتى مەديتسينالىق-سانيتارييالىق العاشقى كومەك (مساك) ۇيىمدارىنا بەكىتۋ ناۋقانى باستالدى. بۇل قازاقستاندىقتارعا وز ەمحاناسىن تاڭداۋعا نەمەسە اۋىستىرۋعا مۇمكىندىك بەرەدى, دەپ حابارلايدى Shalqar.kz.

دەنساۋلىق ساقتاۋ مينيسترلىگىنىڭ مالىمەتىنشە, تىركەۋگە وتىنىش بەرگەندەر كەلەسى جىلدىڭ 1 قاڭتارىنان باستاپ جاڭا ەمحانادا قىزمەت الا الادى. بۇل مۇمكىندىكتى قازاقستان ازاماتتارى, ەلىمىزدە تۇراقتى تۇراتىن شەتەلدىكتەر, ازاماتتىعى جوق ادامدار جانە ەاەو ەلدەرىنەن كەلگەن ەڭبەك ميگرانتتارى پايدالانا الادى (ساقتاندىرۋ شارتى بولعان جاعدايدا).

تىركەۋ eGov.kz پورتالى ارقىلى نەمەسە تاڭداعان ەمحانادا جەكە وتىنىش بەرۋ ارقىلى جۇرگىزىلەدى. بۇرىنعى ەمحانادان شىعۋ اۆتوماتتى تۇردە ىسكە اسادى. ەگەر ازامات ەمحاناسىن وزگەرتكىسى كەلمەسە, قايتا وتىنىش بەرۋدىڭ قاجەتى جوق.

مساك كورسەتۋ وتباسىلىق باقىلاۋ قاعيداتتارىنا نەگىزدەلگەندىكتەن, بارلىق وتباسى مۇشەلەرىن بىر ۋچاسكەلىك دارىگەرگە بەكىتۋ ۇسىنىلادى. بۇل مەديتسينالىق كومەكتىڭ تيىمدىلىگىن ارتتىرادى. ەمحانانى قادامدىق قولجەتىمدىلىك قاعيداتى بويىنشا, ياعني تۇرعىلىقتى جەردەن جاياۋ 15–20 مينۋتتا جەتەتىن اۋماقتا تاڭداۋ ۇسىنىلادى.

دەگەنمەن, وتىنىشتە قاتە دەرەكتەردىڭ بولۋى, باسقا ەلدى مەكەندە تۇرۋ نەمەسە ەمحانادا پاتسيەنتتەر ليميتىنىڭ ارتۋى تىركەۋدەن باس تارتۋعا سەبەپ بولۋى مۇمكىن. بىر ۋچاسكەگە بەكىتىلەتىن حالىق سانىنىڭ شەگى دە بار: جالپى پراكتيكا دارىگەرىنە – 1700 ادامعا دەيىن, ۋچاسكەلىك تەراپەۆتكە – 2200 ەرەسەك ادامعا دەيىن, ال پەدياترعا – جاس ەرەكشەلىگىنە قاراي 500-دەن 900 بالاعا دەيىن.

جىلىنا بىر رەت نەمەسە تۇرعىلىقتى جەرىن, جۇمىسىن اۋىستىرعان جاعدايدا ەمحانانى ناۋقاننان تىس ۋاقىتتا دا وزگەرتۋگە بولادى. بيىلعى بەكىتۋ ناۋقانىنا 694 ەمحانا قاتىسىپ وتىر.

قوسىمشا اقپارات الۋ ۇشىن ازاماتتار وز ەمحاناسىنىڭ پاتسيەنتتەردى قولداۋ قىزمەتىنە نەمەسە الەۋمەتتىك مەديتسينالىق ساقتاندىرۋ قورىنىڭ رەسمي رەسۋرستارىنا جۇگىنە الادى: www.msqory.kz سايتى, Qoldau 24/7 قوسىمشاسى, Telegram-داعى Saqtandyrybot چات-بوتى جانە 1414 بايلانىس ورتالىعى.