قارجى مينيسترلىگىنىڭ مەملەكەتتىك كىرىستەر كوميتەتى موبيلьدى اۋدارىمداردى باقىلاۋ جايىندا رەسمي تۇسىنىكتەمە بەردى. ۆەدومستۆونىڭ مالىمدەۋىنشە, بۇل شارا قاراپايىم ازاماتتارعا ەمەس, تاۋار مەن قىزمەت اقىسىن زاڭسىز تۇردە جەكە شوتىنا قابىلداپ جۇرگەن كاسىپكەرلەرگە باعىتتالعان. ياعني, باستاما كولەڭكەلى بيزنەستى ازايتۋعا ارنالعان, دەپ حابارلايدى Shalqar.kz.

سالىق كوميتەتىنىڭ ايتۋىنشا, قاراپايىم ادامدارعا الاڭداۋدىڭ قاجەتى جوق: تۋىسقا, دوسقا نەمەسە بالا-اتاعا بۇرىنعىداي ەركىن اقشا اۋدارۋعا بولادى. تەكسەرىس تەك ناقتى جاعدايدا عانا جۇرگىزىلەدى. ەگەر بىر جەكە تۇلعا ۇش اي قاتارىنان اي سايىن 100 نەمەسە ودان دا كوپ تۇرلى ادامنان قاراجات السا, ول سالىق ورگاندارىنىڭ نازارىنان تىس قالمايدى. بۇل رەتتە اۋدارىم سانى ەمەس, اقشا جىبەرگەن ادامداردىڭ سانى ەسەپكە الىنادى.

مۇنداي جاعدايدا ازاماتتىڭ دەرەكتەرى بانكتەر ارقىلى سالىق ورگاندارىنا جەتكىزىلەدى. كەيىن مەملەكەتتىك كىرىستەر ورگاندارى كامەرالدىق باقىلاۋ جاساپ, قاجەت بولسا حابارلاما جىبەرەدى. ەگەر ازامات كاسىپكەر رەتىندە تىركەلگەن بولسا, تيىستى سالىق ەسەپتىلىگىن تاپسىرۋى تيىس. ال تىركەلمەگەن جاعدايدا جەكە كاسىپكەر رەتىندە ەسەپكە تۇرىپ, تابىسىن دەكلاراتسيياعا ەنگىزىپ, 10% جەكە تابىس سالىعىن تولەۋى قاجەت.

سونىمەن بىرگە, ەگەر قاراجات تەك تۋىستارىنان نەمەسە دوستارىنان تۇسكەن بولسا, ازامات تۇسىنىكتەمە بەرىپ, حابارلامامەن كەلىسپەۋگە قۇقىلى.