ماڭعىستاۋ وبلىسىندا قايعىلى جول اپاتى تىركەلدى. قاراقييا اۋدانى اۋماعىندا شاعىن اۆتوبۋس اۋدارىلىپ, 10 جولاۋشى كوز جۇمدى. مارقۇمداردىڭ بارلىعى بەكەت-اتا اۋليە كەسەنەسىنە زييارات ەتۋگە بارا جاتقان قازاقستاندىقتار بولعان, دەپ حابارلايدى Shalqar.kz.

پوليتسييانىڭ الدىن الا مالىمەتىنشە, 11 قىركۇيەكتە سەنەك اۋىلىنان 90 شاقىرىم جەردە Toyota Hiace كولىگىنىڭ جۇرگىزۋشىسى رولگە يە بولا الماي, كولىك جول جيەگىنە شىعىپ كەتكەن. سالدارىنان سەگىز ادام وقيعا ورنىندا, تاعى ەكەۋى اۋرۋحاناعا بارار جولدا جان تاپسىرعان. جۇرگىزۋشى مەن ەكى جولاۋشى اۋىر جاراقاتپەن اۋرۋحاناعا جاتقىزىلدى.

دەنساۋلىق ساقتاۋ باسقارماسىنىڭ حابارلاۋىنشا, جانساقتاۋ بولىمىنە جەتكىزىلگەن 1964 جىلى تۋعان ەر ادام مەن 1967 جىلعى ايەلدىڭ جاعدايى وتە اۋىر دەپ باعالانعان. كەيىننەن بىر ناۋقاس سانيتارلىق اۆياتسييامەن وبلىستىق اۋرۋحاناعا جەتكىزىلدى. ال ەكىنشى ناۋقاستىڭ جاعدايى تۇراقتالىپ, بولىمشەگە اۋىستىرىلدى. سونداي-اق 1960 جىلعى تاعى بىر ايەل تراۆماتولوگييا بولىمىندە ەم قابىلداپ جاتىر.

قايعىلى وقيعاعا بايلانىستى قىلمىستىق ىس قوزعالدى. تەرگەۋ امالدارى جۇرگىزىلۋدە, ال قازا تاپقانداردىڭ تۋىستارىن ماڭعىستاۋعا جەتكىزۋ ۇشىن ىىم ارنايى ۇشاق جىبەردى.