جاڭا وقۋ جىلى باستالعان سوڭ اتا-انالاردىڭ ەڭ جيى قوياتىن ساۋالى – بالالارعا قانداي مەديتسينالىق قىزمەتتەردىڭ تەگىن كورسەتىلەتىنى. الەۋمەتتىك مەديتسينالىق ساقتاندىرۋ قورى وسى سۇراققا ناقتى جاۋاپ بەردى, دەپ حابارلايدى Shalqar.kz.

بالالار مىندەتتى الەۋمەتتىك مەديتسينالىق ساقتاندىرۋ جۇيەسىنە اۆتوماتتى تۇردە ەنگىزىلگەن. جارنانى مەملەكەت تولەيتىندىكتەن, وقۋشىلار كەپىلدەندىرىلگەن تەگىن مەديتسينالىق كومەكتى دە, مامس پاكەتى اياسىنداعى قىزمەتتەردى دە الا الادى.

وقۋشىلارعا قولجەتىمدى قىزمەتتەردىڭ ىشىندە:

 • مەكتەپ مەديتسيناسى;

 • ستوماتولوگييالىق كومەك;

 • دارىگەر كەڭەسى;

 • زەرتحانالىق تالداۋلار;

 • زاماناۋي دياگنوستيكالىق قۇرالدار (ۋدز, رەنتگەن, كت, مرت);

 • كۇندىزگى جانە تاۋلىك بويعى ستاتسيونار;

 • وڭالتۋ شارالارى;

 • تەگىن دارى-دارمەك (بەلگىلەنگەن تىزىم بويىنشا);

 • جوعارى تەحنولوگييالىق مەديتسينالىق كومەك بار.

مەكتەپ مەديتسيناسى نەنى قامتيدى?

بۇل – مەكتەپ پەن بالاباقشاداعى بالالارعا كەشەندى مەديتسينالىق كومەك كورسەتۋ جۇيەسى. ونىڭ باستى ماقساتى – وقۋشىلاردىڭ دەنساۋلىعىن قورعاۋ, اۋرۋلاردىڭ الدىن الۋ جانە تۇراقتى باقىلاۋ جۇرگىزۋ.

مەكتەپ مەديتسيناسىنا الدىن الا تەكسەرۋلەر, دەمالىس كەزىندەگى ساۋىقتىرۋ شارالارى, دۇرىس تاماقتانۋدى ناسيحاتتاۋ, رەپرودۋكتيۆتى جانە پسيحيكالىق دەنساۋلىقتى قورعاۋ, زيياندى ادەتتەردىڭ الدىن الۋ, ەكپە جاساۋ, قاجەت بولعان جاعدايدا قوسىمشا تەكسەرۋلەرگە جولداۋ, سانيتارلىق نورمالاردى باقىلاۋ كىرەدى.

بۇل قىزمەتتەردىڭ بارلىعى بالالار تىركەلگەن ەمحانا ارقىلى كورسەتىلەدى. مەكتەپتەگى مەديتسينالىق پۋنكتتەر ارقىلى وقۋشىلاردى تۇراقتى باقىلاۋعا الىپ, دەر كەزىندە كومەك كورسەتۋگە مۇمكىندىك بار.

امسق باسقارما توراعاسىنىڭ ورىنباسارى ينديرا ساركەنوۆانىڭ ايتۋىنشا, اتا-انالاردىڭ “بالانى باسقا ەمحاناعا تىركەپ قويعان” دەگەن شاعىمدارى كەزدەسەدى. مۇنداي جاعداي كوبىنە اقپاراتتىڭ بازاعا كەش ەنگىزىلۋىنەن تۋىندايدى. بالانىڭ سكرينينگ نەمەسە قوسىمشا تەكسەرۋ ناتيجەلەرى تولىق اياقتالعان سوڭ عانا جۇيەگە جۇكتەلەدى.