Jaña oqu jılı bastalğan soñ ata-analardıñ eñ jii qoyatın saualı – balalarğa qanday medicinalıq qızmetterdiñ tegin körsetiletini. Äleumettik medicinalıq saqtandıru qorı osı swraqqa naqtı jauap berdi, dep habarlaydı Shalqar.kz.

Balalar mindetti äleumettik medicinalıq saqtandıru jüyesine avtomattı türde engizilgen. Jarnanı memleket töleytindikten, oquşılar kepildendirilgen tegin medicinalıq kömekti de, MÄMS paketi ayasındağı qızmetterdi de ala aladı.

Oquşılarğa qoljetimdi qızmetterdiñ işinde:

 • mektep medicinası;

 • stomatologiyalıq kömek;

 • däriger keñesi;

 • zerthanalıq taldaular;

 • zamanaui diagnostikalıq qwraldar (UDZ, rentgen, KT, MRT);

 • kündizgi jäne täulik boyğı stacionar;

 • oñaltu şaraları;

 • tegin däri-därmek (belgilengen tizim boyınşa);

 • joğarı tehnologiyalıq medicinalıq kömek bar.

Mektep medicinası neni qamtidı?

Bwl – mektep pen balabaqşadağı balalarğa keşendi medicinalıq kömek körsetu jüyesi. Onıñ bastı maqsatı – oquşılardıñ densaulığın qorğau, aurulardıñ aldın alu jäne twraqtı baqılau jürgizu.

Mektep medicinasına aldın ala tekseruler, demalıs kezindegi sauıqtıru şaraları, dwrıs tamaqtanudı nasihattau, reproduktivti jäne psihikalıq densaulıqtı qorğau, ziyandı ädetterdiñ aldın alu, ekpe jasau, qajet bolğan jağdayda qosımşa tekserulerge joldau, sanitarlıq normalardı baqılau kiredi.

Bwl qızmetterdiñ barlığı balalar tirkelgen emhana arqılı körsetiledi. Mekteptegi medicinalıq punktter arqılı oquşılardı twraqtı baqılauğa alıp, der kezinde kömek körsetuge mümkindik bar.

ÄMSQ basqarma törağasınıñ orınbasarı Indira Sarkenovanıñ aytuınşa, ata-analardıñ “balanı basqa emhanağa tirkep qoyğan” degen şağımdarı kezdesedi. Mwnday jağday köbine aqparattıñ bazağa keş engiziluinen tuındaydı. Balanıñ skrining nemese qosımşa tekseru nätijeleri tolıq ayaqtalğan soñ ğana jüyege jükteledi.