Алматылық «Қайрат» командасының жас қақпашысы Шерхан Қалмұрза Чемпиондар лигасындағы әсерлі ойынымен еуропалық мамандардың көзіне түсті, деп хабарлайды Shalqar.kz.

Лиссабонның «Спортингіне» қарсы өткен матчтан кейін испан журналисі Давид Руис Ла Лига клубтарының қазақстандық қақпашыны қазірден бастап бақылап жүрген болуы мүмкін екенін айтты. «Мен сенімдімін, «Қайрат» ойыншыларын скауттар «Селтикке» дейін де назарда ұстаған. Бірақ Чемпиондар лигасының негізгі кезеңі – мүлде басқа деңгей. Осындай көрсеткіштен соң Шерханға Еуропаның мықты чемпионаттарынан, соның ішінде Ла Лига клубтарынан да қызығушылық болуы заңды. Оның бойында тамаша қасиеттер бар, әрі ол небәрі 18 жаста», – деді Руис Asnews.kz сайтына берген сұхбатында.

Шерхан топтық кезеңнің алғашқы кездесуінде пенальтиді қайтарып, жанкүйерлерді тәнті етті. «Қайрат» 1:4 есебімен жеңілгеніне қарамастан, жас қақпашының сол сейві ойын күнінің үздік бес сейві қатарына енді. Бұған қоса, Transfermarkt порталы оның трансферлік құнын жаңартып, қазіргі бағасын 200 мың еуроға жеткізді.