قازاقستاندا بىر ۋاقىتتا بىرنەشە جۇمىس ورنىندا ەڭبەك ەتۋگە رۇقسات ەتىلگەن. قر ەڭبەك كودەكسىنە سايكەس قىزمەتكەر تۇرلى مەكەمەلەردە قاتار جۇمىس ىستەي الادى, تەك تاۋلىكتىك جۇمىس ۋاقىتى 12 ساعاتتان اسپاۋى شارت, دەپ حابارلايدى Shalqar.kz.

ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, بۇگىندە دارىگەرلەردىڭ كۇنىنە 6 ساعاتتان ەكى مەكەمەدە قاتار قىزمەت ەتۋ تاجىريبەسى كەڭ تارالعان. ال تازالىق سالاسىنىڭ ماماندارى 4 ساعاتتان ۇش جۇمىس بەرۋشىمەن كەلىسىمشارت جاساي الادى.

سالا ەرەكشەلىكتەرىنە قاراي بۋحگالتەرلەر, كۇزەتشىلەر, باعدارلاماشىلار, پەداگوگتەر مەن جۋرناليستەر سيياقتى ماماندىق يەلەرى دە 2-3 جۇمىس ورنىندا قاتار ەڭبەك ەتۋى مۇمكىن. دەگەنمەن 18 جاسقا تولماعاندارعا, اۋىر نەمەسە زيياندى ەڭبەك جاعدايىندا جۇمىس ىستەيتىندەرگە قوسىمشا قىزمەت ىستەۋگە تىيىم سالىنادى.

ال مەملەكەتتىك قىزمەتكەرلەرگە زاڭ بويىنشا قوسىمشا تابىس اكەلەتىن جۇمىسقا ورنالاسۋعا رۇقسات جوق. ولار تەك پەداگوگيكالىق, عىلىمي جانە شىعارماشىلىق قىزمەتپەن عانا اينالىسا الادى. ال كامەلەتكە تولعان كەز كەلگەن ازامات زاڭ تالاپتارىن ساقتاي وتىرىپ قوسىمشا جۇمىس تابۋعا قۇقىلى.