Лос-Анджелесте өтетін 2028 жылғы Олимпиадаға дайындық үшін Халықаралық Олимпиада комитетінің (ХОК) жекелей стипендиясына ие болған қазақстандық спортшылар анықталды, деп хабарлайды Shalqar.kz.

Бұл бағдарлама спортшыларды төртжылдықтың басты додасына іріктеу кезеңінде және дайындық барысында қолдауға бағытталған. Қазақстан Ұлттық Олимпиадалық комитеті ұлттық федерациялармен және ХОК-пен бірлесіп үміткерлерді таңдады. Гендерлік теңдік сақталып, әр спорт түрінен бір ер және бір әйел спортшы ұсынылды.

Стипендия оқу-жаттығу жиындарына, жеке дайындықтарға, бапкерлер еңбекақысын төлеуге, медициналық қызметке және сақтандыруға жұмсалады.

Бағдарламаға енген қазақстандықтар қатарында Аида Әбікеева мен Сағындық Тоғамбай (бокс), Ғұсман Қырғызбаев пен Әбиба Әбужақынова (дзюдо), Милад Карими (гимнастика), Руслан Курбанов (семсерлесу), Исхар Курбаев (грек-рим күресі), Ризабек Айтмұхан (еркін күрес) және тағы басқа спортшылар бар. Бұл мүмкіндік оларға Олимпиада-2028 ойындарына сапалы дайындық жүргізуге жол ашады.