قازاقستاندا الەمگە ايگىلى «اپورت» الماسىنىڭ بىرەگەي سورتىن قايتا جاڭعىرتۋ ىسى جۇيەلى تۇردە قولعا الىنۋدا, دەپ حابارلايدى Shalqar.kz.

اۋىل شارۋاشىلىعى مينيسترى ايداربەك ساپاروۆ قازاق جەمىس-كوكونىس شارۋاشىلىعى عىلىمي-زەرتتەۋ ينستيتۋتىنىڭ «تالعار» ايماقتىق فيليالىنا بارىپ, جوبانى ىسكە اسىرۋ بارىسىن تالقىلادى. كوشپەلى كەڭەس بارىسىندا «2025–2028 جىلدارعا ارنالعان “اپورت” سورتىن قايتا جاڭعىرتۋ» جول كارتاسىنىڭ ورىندالۋى بويىنشا ەسەپتەر تىڭدالىپ, وزەكتى ماسەلەلەر مەن ولاردى شەشۋ تەتىكتەرى قاراستىرىلدى.

جوبا اياسىندا وتكەن جىلى جوڭعار الاتاۋى ۇلتتىق پاركىندە سيۆەرس جابايى الماسىنىڭ 60 مىڭ تۇقىمى جينالىپ, ارنايى القاپتارعا ەگىلدى. سونىمەن قاتار 0,7 گەكتار اۋماقتا كوشەتحانا سالىندى. بيىلعى اقپاندا 0,5 گەكتار جەردە قىسقى ەگۋ جۇرگىزىلىپ, ناتيجەسىندە «اپورت» سورتىنان 2100 تۇپ كوشەت وسىرىلدى. كۇزدە 10 گەكتار اپورت باعى وتىرعىزىلىپ, 2027 جىلعا قاراي مۇنداي القاپتىڭ جالپى كولەمىن 110 گەكتارعا جەتكىزۋ جوسپارلانىپ وتىر.

قىركۇيەك ايىندا ينستيتۋت بازاسىندا «باق كۇنى» شاراسى وتىپ, سەلەكتسيونەر-عالىمدار وزدەرىنىڭ جاڭا زەرتتەۋ ناتيجەلەرى مەن بولاشاقتاعى جوسپارلارىن تانىستىردى. بۇل باستاما مەملەكەت باسشىسىنىڭ تاپسىرماسىنا سايكەس جۇزەگە اسىپ وتىر. «اپورت» – قازاق جەرىنىڭ سيمۆولى ارى قۇندى مادەني مۇرا رەتىندە قايتادان وز بيىگىنە كوتەرىلۋى تيىس دەگەن ماقسات العا قويىلعان.