Бүгін, 30 қыркүйекте Алматы Орталық стадионында өтетін “Қайрат” пен “Реал Мадрид” арасындағы тарихи ойынға орай қалада жол қозғалысына уақытша шектеулер енгізіледі. Полиция департаменті тұрғындар мен қонақтарды алдын ала жолын жоспарлап алуға шақырды, деп хабарлайды Shalqar.kz.

Қалалық ПД мәліметінше, матч кезінде полиция күшейтілген қызмет атқару режиміне көшкен. Қоғамдық тәртіпті сақтау және азаматтардың қауіпсіздігін қамтамасыз ету үшін кешенді шаралар қабылданды. Әсіресе стадион маңында көлік қозғалысына уақытша шектеулер қойылады.

Полиция тұрғындардан түсіністік танытып, қозғалыс схемасын ескеруді сұрайды. 

“Азаматтарға түсіністік танытқаны және қолдау көрсеткені үшін алғыс айтамыз. Бұл –қоғамдық қауіпсіздікті қамтамасыз етуге, іс-шараның жайлы өтуіне бағытталған уақытша қабылданған шаралар”, – делінген ресми хабарламада.

Еске сала кетейік, Чемпиондар лигасының топтық кезеңіндегі “Қайрат” – “Реал Мадрид” матчы бүгін сағат 21:45-те басталады. Бұған дейін полиция жанкүйерлерге қозғалыстағы өзгерістерге дайын болуды ескерткен еді.