الماتىدا 30 قىركۇيەك كۇنى وتەتىن تاريحي ماتچ – “قايرات” پەن الەمنىڭ ايگىلى “رەال مادريد” اراسىنداعى كەزدەسۋدەن كەيىن قالا تۇرعىندارىنا ەرەكشە جاعداي جاسالادى. جانكۇيەرلەر ويىننان سوڭ ۇيلەرىنە ەش قيىندىقسىز جەتۋى ۇشىن اكىمدىك 60 ارنايى اۆتوبۋستى تەگىن جولعا شىعارادى, دەپ حابارلايدى Shalqar.kz.

ورتالىق ستاديون يسپاندىق كلۋبتى قارسى الۋعا تولىق دايىن ەكەنى ايتىلدى. حالىقارالىق تالاپتارعا ساي جارىقتاندىرۋ جۇيەسى, الاڭ ساپاسى, تورەشىلەر مەن ويىنشىلارعا ارنالعان كيىم اۋىستىراتىن بولمەلەر تۇگەلدەي تەكسەرىلدى. سونىمەن قاتار كورەرمەندەردىڭ جايلىلىعى ۇشىن ستاديوننىڭ ىشى جاڭارتىلىپ, 1,5 مىڭنان استام جاڭا ورىندىق ورناتىلىپ, سانيتارلىق جاعداي دا جاقسارتىلدى. قوسىمشا 60 بيودارەتحانا قويىلعان.

ماتچ اياقتالعان سوڭ اۆتوبۋستار التى باعىت بويىنشا قاتىنايدى. ولار اباي, ساتباەۆ جانە بايتۇرسىنۇلى كوشەلەرى ارقىلى جۇرىپ, “الماتى ارەنا”, الماتى-1 ۆوكزالى, “وربيتا”, “جۇلدىز” جانە اۋەجايعا دەيىن جەتكىزەدى.

قاۋىپسىزدىك شارالارى دا كۇشەيتىلگەن. قالا بويىنشا تارتىپتى قاداعالاۋعا 2 382 پوليتسييا قىزمەتكەرى جۇمىلدىرىلادى. ال مەترو جۇمىس ۋاقىتى تۇنگى 01:00-گە دەيىن ۇزارتىلدى. اسىرەسە “بايقوڭىر” جانە “م.اۋەزوۆ اتىنداعى تەاتر” بەكەتتەرىندە قوسىمشا قىزمەتكەرلەر جۇمىس ىستەيدى.