Almatıda 30 qırküyek küni ötetin tarihi matç – “Qayrat” pen älemniñ äygili “Real Madrid” arasındağı kezdesuden keyin qala twrğındarına erekşe jağday jasaladı. Janküyerler oyınnan soñ üylerine eş qiındıqsız jetui üşin äkimdik 60 arnayı avtobustı tegin jolğa şığaradı, dep habarlaydı Shalqar.kz.

Ortalıq stadion ispandıq klubtı qarsı aluğa tolıq dayın ekeni aytıldı. Halıqaralıq talaptarğa say jarıqtandıru jüyesi, alañ sapası, töreşiler men oyınşılarğa arnalğan kiim auıstıratın bölmeler tügeldey tekserildi. Sonımen qatar körermenderdiñ jaylılığı üşin stadionnıñ işi jañartılıp, 1,5 mıñnan astam jaña orındıq ornatılıp, sanitarlıq jağday da jaqsartıldı. Qosımşa 60 biodärethana qoyılğan.

Matç ayaqtalğan soñ avtobustar altı bağıt boyınşa qatınaydı. Olar Abay, Sätbaev jäne Baytwrsınwlı köşeleri arqılı jürip, “Almatı Arena”, Almatı-1 vokzalı, “Orbita”, “Jwldız” jäne äuejayğa deyin jetkizedi.

Qauipsizdik şaraları da küşeytilgen. Qala boyınşa tärtipti qadağalauğa 2 382 policiya qızmetkeri jwmıldırıladı. Al metro jwmıs uaqıtı tüngi 01:00-ge deyin wzartıldı. Äsirese “Bayqoñır” jäne “M.Äuezov atındağı teatr” beketterinde qosımşa qızmetkerler jwmıs isteydi.