Қостанайдың «Тобыла» тағы да тарихқа енді – команда 2025 жылғы Қазақстан кубогын жеңіп алып, өз жанкүйерлерін қуанышқа бөледі. Қызылордада өткен финалда қостанайлықтар шымкенттік «Ордабасыны» 2:0 есебімен тізе бүктірді, деп хабарлайды Shalqar.kz.

Матч Қызылорданың жаңа «Қайсар Арена» стадионында өтті. Бұл – 11 мың орындық аренаның алғашқы ресми ойыны. Кездесудің 19-минутында капитан Асхат Тағыбергеннің соққысынан кейін беларусь шабуылшысы Николай Сигневич қақпа торын тулатып, есепті ашты. Ал 33-минутта Ислам Чесноков серпілген допты тиімді пайдаланып, таблодағы көрсеткішті еселеді.

Осылайша, «Тобыл» өз тарихындағы үшінші кубогын иеленді. Бұған дейін команда 2007 және 2023 жылдары да чемпион болған. Енді қостанайлықтар трофей саны бойынша «Астана» және «Жеңіс» клубтарымен теңесті — әрқайсысында үш жеңіс бар. Ал көш басында он мәрте жеңіске жеткен «Қайрат» тұр.

Бұл жеңіс «Тобылға» келесі маусымда Конференциялар лигасында ел намысын қорғау құқығын сыйлады.