20 قازاننان باستاپ قازاقستانعا كەيبىر كولىك تۇرلەرىن اكەلۋگە رەسمي تۇردە تىيىم سالىنادى. جاڭا تالاپتار ەۋرازييالىق ەكونوميكالىق كوميسسييانىڭ (ەەك) 23 مامىرداعى №45 شەشىمىنە سايكەس ەنگىزىلىپ وتىر, دەپ حابارلايدى Shalqar.kz.

بۇل قۇجات “دوڭگەلەكتى كولىك قۇرالدارىنىڭ قاۋىپسىزدىگى تۋرالى” تەحنيكالىق رەگلامەنتكە وزگەرىستەر ەنگىزۋدى كوزدەيدى. ەندى “جەكەلەگەن كولىك قۇرالى” ۇعىمى جاڭاشا تۇسىندىرىلەدى. قازاقستان ازاماتتارى جەكە پايدالانۋ ۇشىن تەك بەلگىلى بىر ساناتتاعى كولىكتەردى عانا شەتەلدەن اكەلە الادى.

20 قازاننان كەيىن ەلگە تەك تومەندەگى كولىكتەردى اكەلۋگە رۇقسات بەرىلەدى:

• جەڭىل اۆتوكولىكتەر (مەديتسينالىق ماقساتتاعى ارنايى كولىكتەردەن باسقا);
• جولسىز جەرمەن جۇرەتىن تەحنيكالار – كۆادروتسيكلدەر, موتوۆەزدەحودتار, سنوۋبايكتار (جارىس كولىكتەرىن قوسپاعاندا);
• موتوتسيكلدەر, موتوروللەرلەر جانە موپەدتەر;
• شاعىن جۇك كولىكتەرى مەن 12 ورىنعا دەيىنگى ميكرواۆتوبۋستار;
• تولىق سالماعى 5 توننادان اسپايتىن جۇك كولىكتەرى (راديواكتيۆتى ماتەريال تاسىمالدايتىن كولىكتەردەن باسقا).

ال اۋىر جۇك كولىكتەرى, اۆتوبۋستار جانە كەيبىر ارنايى تەحنيكا تۇرلەرىن ەلگە كىرگىزۋگە تىيىم سالىنادى. سونىمەن قاتار اربىر كولىك قۇرالى قاۋىپسىزدىك سەرتيفيكاتىنا يە بولۋى مىندەتتى. ونسىز كولىكتى كەدەندىك راسىمدەۋگە, تەحنيكالىق پاسپورت الۋعا, ۋتيليزاتسييالىق تولەم تولەۋگە نەمەسە مەملەكەتتىك تىركەۋگە قويۋعا بولمايدى.

ايتا كەتەيىك, 2026 جىلدان باستاپ قازاقستاندىق جۇرگىزۋشىلەر وز اۆتوكولىكتەرىنىڭ نومىرىن ەركىن تاڭداي الادى. ماسەلەن, ستاندارتتى نومىر 12 110 تەڭگە تۇرسا, 010, 070, 090 سەكىلدى نومىرلەردىڭ باعاسى 246 525 تەڭگەدەن باستالادى. ال 111, 222, 999 سيياقتى ەرەكشە نومىرلەر — 592 525 تەڭگە, VIP-نومىرلەر (001, 007, 777 جانە ت.ب.) — 986 100 تەڭگە تۇرادى. تىپتى 123AZA01 سەكىلدى وز كومبيناتسيياڭىزدى جاساۋعا دا مۇمكىندىك بار — ونىڭ باعاسى 43 250 تەڭگە بولادى.