Алматылық «Қайрат» өз жанкүйерлерінің көз алдында тамаша ойын өрнегін көрсетіп, «Жетісуды» ойсырата жеңді. Қазақстан Премьер-лигасының 24-туры аясындағы бұл кездесуде есеп 5:0 болып тіркелді, деп хабарлайды Shalqar.kz.

Ойынның тағдыры алғашқы таймда-ақ шешілді. 9-минутта 17 жастағы Дастан Сәтпаев пенальтиден дәл соққы жасап, чемпионаттағы 12-голын тіркеді. Көп ұзамай португалиялық легионер Жоржиньо есепті еселеп, ал 35-минутта дубль авторы атанды. Тайм соңында бразилиялық Эдмилсон Сантос командасының төртінші голын соғып, интриганы түбегейлі жойды. Қорытынды есепті 90-минутта Азамат Тұяқбаев бекітті — 5:0.

Бұл жеңістен кейін Рафаэль Уразбахтин жаттықтыратын «Қайрат» 55 ұпай жинап, 53 ұпайы бар «Астананы» артқа тастап, турнирлік кестеде көш бастады. Ал Самат Смақовтың шәкірттері 21 ұпаймен 11-орынға сырғыды.