Физиология және медицина саласындағы 2025 жылғы Нобель сыйлығының иегерлері жария етілді. Биыл беделді марапат ғалымдар Мэри Брунков, Фред Рамсделл және Шимон Сакагучиге берілді, деп хабарлайды Shalqar.kz.

Зерттеушілер ағзаны өз иммундық жүйесінің шабуылынан қорғайтын ерекше Т-жасушаларды анықтаған. Бұл жаңалық иммундық төзімділіктің қалай жұмыс істейтінін және неге көп адамдарда аутоиммундық аурулар дамымайтынын түсінуге мүмкіндік берді. Ғалымдардың жұмысы адам ағзасындағы қорғаныс тетіктерін зерттеуде жаңа дәуір ашты.

Нобель қорының мәліметінше, сыйлық медицина мен физиология саласында адамзатқа елеулі пайда әкелген ең үздік жаңалықтарға беріледі. Еске сала кетейік, бұл марапат алғаш рет өнертапқыш әрі кәсіпкер Альфред Нобельдің өсиеті бойынша тағайындалған. Ол өз байлығын “адамзатқа ең үлкен игілік әкелгендерге” беру туралы өсиет қалдырған еді.