زايسان اۋداندىق سوتىندا شىلىكتى اۋىلىنىڭ اكىمىنە قاتىستى ىس قارالدى. تۇرعىنداردى بالاعاتتاعان شەنەۋنىككە ايىپپۇل سالىندى, دەپ حابارلايدى Shalqar.kz.

اۋىل تۇرعىندارىنا بەيادەپ سوزدەردى جاۋدىرعان اكىمگە قاتىستى "ۇساق بۇزاقىلىق" بابى بويىنشا اكىمشىلىك ىس قوزعالعان.

"6 قازاندا ساعات 15:00 شاماسىندا لاۋازىمدى تۇلعا اكىمدىك عيماراتىنداعى قىزمەتتىك كابينەتىندە, اۋىل تۇرعىندارى مەن قوعامدىق بىرلەستىك وكىلدەرىنىڭ كوزىنشە, اينالاسىنداعىلارعا قۇرمەتسىزدىك تانىتىپ, بەيادەپ سوزدەر ايتقانى انىقتالدى", - دەلىنگەن سوت حابارلاماسىندا.

سوت بارىسىندا اكىم وز كىناسىن تولىق مويىنداپ, كەزدەسۋگە قاتىسۋشىلارعا قاتىستى بەيادەپ سوزدەر ايتقانىن جوققا شىعارمادى. ول جاساعان ارەكەتىنە وكىنەتىنىن بىلدىرىپ, كوپشىلىك الدىندا كەشىرىم سۇرادى.

اكىمشىلىك قۇقىقبۇزۋشىلىقتىڭ جاسالعانى سوتتا قارالعان بەينەجازبامەن, كۋالاردىڭ ايعاقتارىمەن جانە وز تۇسىنىكتەمەسىمەن راستالدى.

زايسان اۋداندىق سوتىنىڭ قاۋلىسىمەن شەنەۋنىك قر اقبتك-نىڭ 434-بابى 1-بولىگى بويىنشا اكىمشىلىك قۇقىقبۇزۋشىلىق جاساعانى ۇشىن كىنالى دەپ تانىلىپ, وعان 55 048 تەڭگە كولەمىندە اكىمشىلىك ايىپپۇل تۇرىندەگى جازا تاعايىندالدى.

قاۋلى زاڭدى كۇشىنە ەنگەن جوق.