Zaysan audandıq sotında Şilikti auılınıñ äkimine qatıstı is qaraldı. Twrğındardı balağattağan şeneunikke ayıppwl salındı, dep habarlaydı Shalqar.kz.

Auıl twrğındarına beyädep sözderdi jaudırğan äkimge qatıstı "Wsaq bwzaqılıq" babı boyınşa äkimşilik is qozğalğan.

"6 qazanda sağat 15:00 şamasında lauazımdı twlğa äkimdik ğimaratındağı qızmettik kabinetinde, auıl twrğındarı men qoğamdıq birlestik ökilderiniñ közinşe, aynalasındağılarğa qwrmetsizdik tanıtıp, beyädep sözder aytqanı anıqtaldı", - delingen sot habarlamasında.

Sot barısında äkim öz kinäsin tolıq moyındap, kezdesuge qatısuşılarğa qatıstı beyädep sözder aytqanın joqqa şığarmadı. Ol jasağan äreketine ökinetinin bildirip, köpşilik aldında keşirim swradı.

Äkimşilik qwqıqbwzuşılıqtıñ jasalğanı sotta qaralğan beynejazbamen, kuälardıñ ayğaqtarımen jäne öz tüsiniktemesimen rastaldı.

Zaysan audandıq sotınıñ qaulısımen şeneunik QR ÄQBtK-niñ 434-babı 1-böligi boyınşa äkimşilik qwqıqbwzuşılıq jasağanı üşin kinäli dep tanılıp, oğan 55 048 teñge köleminde äkimşilik ayıppwl türindegi jaza tağayındaldı.

Qaulı zañdı küşine engen joq.