پرەزيدەنت استانا قالاسىنداعى بوتانيكالىق ساياباقتا ەرىكتى جانە بەلسەندى جاستارمەن بىرگە اعاش ەكتى. جالپىۇلتتىق ىس-شارا اياسىندا بيىل رەسپۋبليكا اۋماعىندا 2,4 ميلليونعا جۋىق كوشەت وتىرعىزىلعان, دەپ حابارلايدى Shalqar.kz.

مەملەكەت باسشىسى Jasyl El ۇيىمىنىڭ بەلسەندىلەرىمەن اڭگىمەلەسىپ, قوعامدىق جۇمىسقا اتسالىسىپ جۇرگەن جاستارعا العىس ايتتى:

– بارشاڭىزعا ريزاشىلىعىمدى بىلدىرەمىن. بۇل – وتە قاجەتتى جۇمىس. ەلىمىز بەن حالقىمىز ۇشىن كەرەك ىس. سوندىقتان سىزدەرگە تابىس تىلەيمىن. ىستەرىڭىز ساتتى بولسىن. ەڭ الدىمەن نيەتىمىز تازا بولۋى كەرەك. وتانىمىز ۇشىن قىزمەت ەتۋگە تيىسپىز. Jasyl El ۇيىمىنىڭ جۇمىسىن قولدايمىن. جۇمىستارىڭىز وزگە جاستارعا ونەگە, ولار سىزدەردەن ۇلگى الادى, – دەدى قاسىم-جومارت توقاەۆ.

مەملەكەت باسشىسى قالا ينفراقۇرىلىمىن جەتىلدىرۋ, تۇرعىندارعا زاماناۋي ارى قولايلى, ەكولوگييالىق تۇرعىدان تازا ورتا قالىپتاستىرۋ باعىتىنداعى جۇمىستاردى جالعاستىرۋ جونىندە تاپسىرما بەردى.