استانادا وتكەن XII ازاماتتىق فورۋم اياسىندا ۇكىمەتتىك ەمەس ۇيىمدارعا ارنالعان «ۇەۇ سىيلىعى – 2025» ماراپاتىن تابىستاۋدىڭ سالتاناتتى راسىمى وتتى, - دەپ حابارلايدى Shalqar.kz تىلشىسى, قر مادەنيەت جانە اقپارات مينيسترلىگىنىڭ باسپاسوز قىزمەتىنە سىلتەمە جاساپ.

اتالعان سىيلىق 2017 جىلدان باستاپ الەۋمەتتىك ماڭىزى بار ماسەلەلەردى شەشۋگە قوسقان ۇلەسى ۇشىن تابىستالىپ كەلەدى. ونىڭ باستى ماقساتى – ازاماتتىق سەكتوردىڭ دامۋىنا قولداۋ كورسەتۋ جانە ۇەۇ قىزمەتىن ىنتالاندىرۋ. وسى ۋاقىتقا دەيىن بۇل ماراپاتتىڭ يەگەرى اتانعان ۇيىمداردىڭ سانى 486-عا جەتكەن.

بيىل كونكۋرسقا ەلىمىزدىڭ بارلىق وڭىرىنەن 208 وتىنىم كەلىپ تۇستى. ساراپشىلار مەن كونكۋرستىق كوميسسييانىڭ قاراۋ ناتيجەسىندە 73 ۇيىم جەڭىمپاز دەپ تانىلدى.

ايتا كەتەرلىگى, ولاردىڭ قاتارىندا اۋىلدىق جەرلەردەن 11 جانە مۇمكىندىگى شەكتەۋلى جانداردىڭ 6 بىرلەستىگى بار. بۇل بايقاۋدىڭ اشىقتىعىن, قولجەتىمدىلىگىن جانە ارتۇرلى دەڭگەيدەگى باستامالاردى قامتيتىن كەڭ اۋقىمدىلىعىن كورسەتەدى.

سونىمەن قاتار, بىرقاتار ۇيىمدار رەسپۋبليكالىق قوعامدىق «تاڭداۋ» سىيلىعىمەن ماراپاتتالدى.

بۇدان بولەك, قايىرىمدىلىق سالاسىندا ايرىقشا بەلسەندىلىك تانىتقان 33 قازاقستاندىققا قۇرمەتتى اتاق بەرىلدى.

  بيىلعى جەڭىمپازدار قاتارىندا حالىقارالىق «جاناشىر» قوعامدىق قورى دا بار. سىيلىقاقى ازاماتتار مەن ۇيىمداردىڭ قۇقىقتارىن, زاڭدى مۇددەلەرىن قورعاۋ نوميناتسيياسى بويىنشا بەرىلدى. ۇيىم 2017 جىلى دا تاريحي-مادەني مۇرانى قورعاۋ نوميناتسيياسى بويىنشا جەڭىمپاز اتانعان ەدى.

جالپى, بيىلعى ۇمىتكەرلەردىڭ باستامالارى اياسىندا الەۋمەتتىك تۇرعىدا ماڭىزدى كوپتەگەن ىستەر اتقارىلدى. اتاپ ايتقاندا, مۇقتاج جاندارعا اتاۋلى كومەك كورسەتۋ, وڭالتۋ ورتالىقتارىن, ينكليۋزيۆتى سىنىپتاردى, وقۋ جانە سپورت الاڭدارىن اشۋ, اۋىلدىق جەرلەردەگى كوپىرلەردى, ستاديوندار مەن مەكتەپتەردى جوندەۋ, مادەني جوبالاردى قولداۋ, توتەنشە جاعدايلاردىڭ سالدارىن جويۋعا قاتىسۋ جانە ت.ب.

سونداي-اق بۇگىن XII ازاماتتىق فورۋم شەڭبەرىندە جيىرمادان استام پىكىرتالاس جانە ساراپتامالىق الاڭ ۇيىمداستىرىلدى. ولاردىڭ اراسىندا «Smart قايىرىمدىلىق» فورۋمى, «جاساندى ينتەللەكت – ەكونوميكانىڭ دامۋ درايۆەرى», «ازاماتتىق فورۋم: ۇسىنىستان ناتيجەگە», «ينكليۋزييا: يننوۆاتسييالار تەڭ مۇمكىندىك اشقاندا» اتتى TEDx-پانەلь, سونداي-اق «ەكولوگييا – XXI عاسىردىڭ جاھاندىق باسىمدىعى» ينتەراكتيۆتى سەسسيياسى جانە باسقا دا ماڭىزدى ىس-شارالار وتتى.