قىزىلوردا وبلىسى جاڭاقورعان اۋدانىنىڭ ورتالىعىنداعى «ىقىلاس» مەشىتىندە قۇران كارىمنەن وبلىستىق قاريلار بايقاۋى وتتى. شارا «قوجاكەنت» اۋىلىنىڭ ىرگەتاسىن قالاۋشىلاردىڭ بىرى, اۋىلشارۋاشىلىق سالاسىنىڭ ارداگەرى, قوعام قايراتكەرى امانتاي اپەتۇلى مەن باتىر انا ۇلداناي قاجى ابدىكەرىمقىزىن ەسكە الۋعا ارنالدى, دەپ حابارلايدى Shalqar.kz.

   شارا ماقساتى – مارقۇمداردى ەسكە الا وتىرىپ, قۇران ىلىمىن ناسيحاتتاۋ, جاس قاريلاردىڭ تالابىن قولداۋ جانە ۇمىت بولماس رۋحاني ورتانى قالىپتاستىرۋ.

   بايقاۋعا جاس تا, ەرەسەك تە قاريلار قاتىسىپ, قاسيەتتى قۇران اياتتارىن كوركەم مانەرمەن, تاجۋيد ەرەجەسىنە ساي جاتقا وقىپ, كورەرمەننىڭ ەرەكشە ىقىلاسىنا بولەندى.

    ەكى اتالىم بويىنشا وتكەن بايقاۋعا 40-تان اسا قاريلار قاتىستى. قاريلار كونكۋرسىنا وبلىستىڭ بىلىكتى دىن ماماندارى قازىلىق ەتتى. بايقاۋ جەڭىمپازدارى اپەتوۆتەر اۋلەتىنىڭ دەمەۋشىلىگىمەن باعالى سىيلىقتارمەن ماراپاتتالدى.

    بىرىنشى اتالىم بويىنشا باس جۇلدەگە يە بولعان جۇماباي دارىنعا ۋمرا قاجىلىق ساپارىنا جولداما بەرىلدى. 1-ورىندى  مىرزابەك دىنمۇحاممەد,  2-ورىندى جاقسىبەك نۇرسۇلتان, 3-ورىندى بەگالى راحات يەمدەنىپ, باعالى سىيلىقتارعا يە بولدى.

   ەكىنشى اتالىم بويىنشا  باس جۇلدە - ۋمرا قاجىلىق ساپارىنا جولداما قالدىباي باۋبەك ۇستازعا بەرىلدى. 1-ورىن تاڭات جانداۋلەتكە, 2-ورىن - ناريمان رامازانعا, 3-ورىن - يسمايلوۆ اميرۋللاعا بەرىلدى.

   ىس-شارانى جاڭاقورعان اۋدانىنىڭ باس يمامى نامەتوۆ ابدىحالىق ماحمۋتۇلى, اۋداننىڭ نايب يمامى سىزدىق نۇرجىگىت ازاماتۇلى جوعارى دەڭگەيدە ۇيىمداستىرسا, «Qubyla Travel» كومپانيياسىنىڭ باسشىسى قۋانىش اسەت ەرجىگىتۇلى ۇزدىك شاكىرتتىڭ ۇستازىنا ۋمرا قاجىلىق ساپارىنا جولداما سىيلاپ قۋانتتى.

    يمان مەن ىلىم توعىسقان, جۇرەكتەردى رۋحاني نارگە بولەگەن ەرەكشە شارا – قاريلار بايقاۋى جوعارى دەڭگەيدە وتتى.

     مارقۇمدارعا قۇران كارىمدى حاتىمداعان اۋدان مەشىتىنىڭ يمامدارىنا, وسىناۋ ىزگى شارانى ۇيىمداستىرۋشىلارعا جانە قاتىسۋشىلارعا  اپەتوۆتەر اۋلەتى العىستارىن بىلدىردى.

   قاسيەتتى قۇران داۋىسى جۇرەكتەردە جاڭعىرا بەرسىن!