بۇگىن «حابار» اگەنتتىگىنە 30 جىل. بۇل -شاعىن ۇجىمنان حالىقارالىق دەڭگەيدەگى مەديا قۇرىلىمعا اينالعان الپاۋىت. 

«حابار» اگەنتتىگى وزىنىڭ 30 جىلدىق تاريحىندا اقپاراتتىق ساياساتتى ەڭ سەنىمدى جەتكىزۋشى, ساياسي, الەۋمەتتىك-مادەني قۇندىلىقتار مەن داستۇرلەردى ناسيحاتتاۋشى  قۇرال ەكەنىن دالەلدەدى. بۇگىن الىپ تەلەوتباسى 30 جىلدىق مەرەيتويىن ەرەكشە اتاپ وتتى, دەپ حابارلايدى Shalqar.kz.

بۇل كەش بۇرىنعى كەشتەن وزگەشە. «حابار» اگەنتتىگىنىڭ 30 جىلدىعىنا مەدياحولدينگ قىزمەتكەرلەرى تەگىس جينالدى. مەرەكەلىك جيىندا تەلەارنانىڭ قالىپتاسۋىنا ۇلەس قوسقان ارداگەرلەر مەن ولاردىڭ ىزىن جالعاعان ارىپتەستەرىمىزگە ارنايى قۇرمەت كورسەتىلدى. اتى اڭىزعا اينالعان اگەنتتىكتى پرەزيدەنت مەرەيتويمەن قۇتتىقتادى. مەملەكەت باسشىسىنىڭ قۇتتىقتاۋىن  پرەزيدەنتتىڭ ىشكى ساياسات جانە كوممۋنيكاتسييالار ماسەلەلەرى جونىندەگى كەڭەسشىسى ارمان قىرىقباەۆ جەتكىزدى.

ارمان قىرىقباەۆ, قر پرەزيدەنتىنىڭ ىشكى ساياسات ماسەلەلەرى جانە كوممۋنيكاتسييالار جونىندەگى كومەكشىسى:

- وسى ۋاقىت ىشىندە ەلىمىزدىڭ اقپارات كەڭىستىگىندە وز ورنى بار بەدەلدى مەدياقۇرىلىمعا اينالدى. بىرەگەي باستامالار مەن تىڭ جوبالاردى تابىستى جۇزەگە اسىردى. اقپارات مايتالماندارى ۇجىمى ەلىمىزدەگى جانە الەمدەگى وقيعالار تۋرالى شىنايى حابار تاراتىپ, حالىققا مەملەكەتتىك ساياساتتىڭ مان-ماڭىزىن تۇسىندىرۋگە زور ۇلەس قوسىپ كەلەدى. بارشاڭىزعا شابىت, تولاعاي تابىس تىلەيمىن. قاسىم-جومارت توقاەۆ.

30 جىل ىشىندە اگەنتتىك الپاۋىت اقپاراتتىق ورتالىققا اينالىپ, كورەرمەنمەن بىرگە قالىپتاستى. 

اگەنتتىكتىڭ مەرەيتويىنا وراي پارلامەنتتىڭ قوس پالاتا توراعالارى دا ارنايى قۇتتىقتاۋ جولدادى. سەنات سپيكەرى ماۋلەن اشىمباەۆ پەن ماجىلىس توراعاسى ەرلان قوشانوۆ: «حابار» وتىز جىل بويى كورەرمەننىڭ سەنىمىن ساقتاي وتىرىپ, ۇلتتىڭ ايناسى بولىپ قالىپتاسقانىن جەتكىزدى.  حاباردىڭ مەرەيلى تويىندا مادەنيەت جانە اقپارات مينيسترى ايدا بالاەۆا: «حابار»  بۇل جاي عانا مەديا اگەنتتىك ەمەس, «تالاي تەلەكادرلار تۇسىرىلگەن تاۋەلسىز قازاقستاننىڭ تىرى تاريحى» دەپ اتاپ وتتى.