Esik memlekettik tarihi-mädeni muzey-qorığında «Arheologiya salasındağı halıqaralıq zertteuler: täjiribe, nätijeleri men basım bağıttarı» taqırıbında «Esik oquları» VI Halıqaralıq ğılımi-täjiribelik konferenciya ötti, dep habarlaydı QR Mädeniet jäne aqparat ministrliginiñ baspasöz qızmetine silteme jasağan Shalqar.kz.

Halıqaralıq konferenciyağa Qazaqstan, Qıtay, Wlıbritaniya, Resey, Özbekstan, Qırğızstan, Täjikstan, Türkiya jäne Äzerbayjannan kelgen arheologtar men muzey isiniñ mamandarı qatıstı.

Konferenciya birqatar mañızdı tarihi oqiğalarmen twspa-tws keldi. Atap aytsaq, biıl Altın adamnıñ tabılğanına 55 jıl, «Esik» memlekettik tarihi-mädeni qorıq-muzeyiniñ qwrılğanına 15 jıl, sonday-aq körnekti arheolog-ğalım Bekmwhanbet Nwrmwhanbetovtıñ tuğanına 90 jıl tolıp otır.

İs-şara barısında QR Mädeniet jäne aqparat ministrligi Mädeniet komitetiniñ törağası Erlan Däkenov elimizde tarihi-mädeni mwranı zertteu, saqtau jäne nasihattau bağıtında jüyeli jwmıs jürgizilip jatqanın jäne bwl bağıtta mwnday ğılımi is-şaralardıñ mañızı zor ekenin atap ötti.

Muzey-qorıq aşılğan künnen bastap muzey qızmetin körsetip qana qoymay, ğılımi-zertteu ortalığı retinde de belsendi jwmıstar atqaruda. 2017 jıldan beri Şen'si provinciyasınıñ Arheologiya institutımen (QHR) tığız äriptestik baylanıs ornatıldı, nätijesinde birqatar birlesken ğılımi joba jüzege asırıldı. Atap aytsaq, Qıtaydıñ Soltüstik-Batıs universitetiniñ Jibek jolı arheologiyasın zertteu ortalığınıñ Qazaqstandağı filialı jwmıs istep twr.

Plenarlıq otırıstar men sekciyalıq sessiyalar barısında Qazaqstandağı arheologiyalıq eskertkişterdi saqtau men tiimdi paydalanu, tarihi-mädeni mwra nısandarın qorğau ädisteri, pänaralıq zertteuler men muzey isindegi zamanaui mindetter keñinen talqılandı. 

Sonday-aq konferenciyada arheologiya ğılımınıñ damuına zor üles qosqan Bekmwhanbet Nwrmwhanbetovtıñ ğılımi jolı da söz etildi.

Bağdarlama ayasında «Rahat arheologiyalıq keşeni» attı monografiya men «Esik» memlekettik muzey-qorığı jönindegi alğaşqı qıtay tilindegi nwsqaulıqtıñ twsaukeseri ötti. Sonımen qatar, YUNESKO-nıñ Bükilälemdik mwralar tizimine engen Talğar (Talhiz) ortağasırlıq qalaşığınıñ aumağında «Talhiz qazınaları» köşpeli körmesi wyımdastırıldı.

Konferenciya qorıtındısı boyınşa tarihi-mädeni mwranı qorğau men tiimdi paydalanu, arheologiyalıq zertteulerdiñ teoriyalıq jäne qoldanbalı aspektilerin damıtu, halıqaralıq ıntımaqtastıqtı nığaytu bağıttarında qabıldanğan Rezolyuciya jariyalandı.