استانادا «SARAP» ساراپتامالىق كلۋبىنىڭ «حىى ازاماتتىق فورۋم ناتيجەلەرى: ازاماتتىق بەلسەندىلىك – ەل دامۋىنىڭ قاينار كوزى» تاقىرىبىندا وتىرىسى وتتى, دەپ حابارلايدى Shalqar.kz قر مادەنيەت جانە اقپارات مينيسترلىگىنىڭ باسپاسوز قىزمەتىنە سىلتەمە جاساپ.

جيىن بارىسىندا قاتىسۋشىلار فورۋمنىڭ نەگىزگى ناتيجەلەرىن, ۇسىنىلعان فورماتتىڭ تيىمدىلىگىن, سونداي-اق مەملەكەت پەن ازاماتتىق قوعام اراسىنداعى وزارا بايلانىستى نىعايتۋعا باعىتتالعان الداعى قادامداردى تالقىلادى.

كەزدەسۋ بارىسىندا قر مادەنيەت جانە اقپارات مينيسترلىگىنىڭ ازاماتتىق قوعام ىستەرى كوميتەتىنىڭ توراعاسى گۇلبارا سۇلتانوۆا فورۋمنىڭ نەگىزگى جەتىستىكتەرىن اتاپ وتتى. ول بۇل ىس-شارا وزەكتى ماسەلەلەردى اشىق تالقىلاۋعا جانە ازاماتتىق سەكتوردى دامىتۋعا باعىتتالعان مەملەكەتتىك ساياساتتىڭ باسىم باعىتتارىن ايقىنداۋعا مۇمكىندىك بەرگەن تيىمدى ديالوگ الاڭى بولعانىن ايتتى.

سونىمەن قاتار ۇكىمەتتىك ەمەس ۇيىمدارمەن تۇراقتى جانە جۇيەلى ارىپتەستىكتىڭ ماڭىزى, سونداي-اق فورۋم اياسىندا ازىرلەنگەن ۇسىنىمداردى ىس جۇزىندە جۇزەگە اسىرۋ قاجەتتىگى ەرەكشە اتاپ وتىلدى.

وتىرىس بارىسىندا مەملەكەتتىك قولداۋ اياسىندا جۇزەگە اسىرىلعان ۇكىمەتتىك ەمەس ۇيىمداردىڭ الەۋمەتتىك جوبالارعا جۇرگىزىلگەن زەرتتەۋ ناتيجەلەرى ۇسىنىلدى. زەرتتەۋ بۇل جوبالاردىڭ الەۋمەتتىك ماسەلەلەردى شەشۋدە تيىمدى قۇرالعا اينالعانىن كورسەتتى.

سونداي-اق ازاماتتاردىڭ شەشىم قابىلداۋ پروتسەستەرىنە بەلسەندى قاتىسۋى ۇشىن ۇەۇ-نىڭ كاسىبي الەۋەتىن ارتتىرۋ جانە تسيفرلىق شەشىمدەردى ەنگىزۋ بويىنشا ۇسىنىستار قارالدى.