ريمدەگى ۆيللا گراتسيولي ساياباعىندا (Parco di Villa Grazioli) قازاق حالقىنىڭ ۇلى اقىنى ارى ويشىلى اباي قۇنانبايۇلى بيۋستىنىڭ سالتاناتتى اشىلۋى وتتى. ىس-شاراعا قر مادەنيەت جانە اقپارات مينيسترى ايدا بالاەۆا, قازاقستان رەسپۋبليكاسىنىڭ يتالييا رەسپۋبليكاسىنداعى توتەنشە جانە وكىلەتتى ەلشىسى ەربولات سەمباەۆ, يتالييالىق زييالى قاۋىم وكىلدەرى مەن قازاقستاننىڭ رەسمي دەلەگاتسيياسى مۇشەلەرى قاتىستى, دەپ حابارلايدى Shalqar.kz قر مادەنيەت جانە اقپارات مينيسترلىگىنىڭ باسپاسوز قىزمەتىنە سىلتەمە جاساپ.

مينيستر سالتاناتتى ىس-شارادا سويلەگەن سوزىندە اباي قۇنانبايۇلى – قازاق حالقىنىڭ رۋحاني كەمەلدەنۋىنە باعدار بولعان, ادامزاتتىڭ اسىل مۇراتتارىن ناسيحاتتاعان ۇلى تۇلعا ەكەنىن اتاپ وتتى. ونىڭ شىعارمالارىنداعى باستى يدەيا – ادامگەرشىلىك, ادىلدىك, بىلىم مەن ەڭبەك ارقىلى ىزگىلىككە ۇندەۋ.

سوندىقتان دا اباي بەينەسىنىڭ دال ريم قالاسىندا بوي كوتەرۋى – مادەنيەتتەر مەن وركەنيەتتەر اراسىنداعى رۋحاني كوپىردىڭ بەلگىسى بولارى انىق.

«كەيىنگى جىلدارى مەملەكەتتەرىمىز اراسىنداعى قارىم-قاتىناس ەرەكشە سەرپىن الدى. وتكەن جىلى قازاقستان رەسپۋبليكاسىنىڭ پرەزيدەنتىنىڭ يتاليياعا رەسمي ساپارى مەن يتالييا مينيسترلەر كەڭەسىنىڭ تورايىمى قازاقستانعا جاساعان رەسمي ساپارى ىنتىماقتاستىقتى جاڭا دەڭگەيگە كوتەردى. ال قىركۇيەك ايىندا يتالييا پرەزيدەنتى قازاقستانعا كەلىپ, جاڭا بايلانىستارعا جول اشىپ, بىرقاتار ماڭىزدى كەلىسسوزدەر جاسالدى. بۇگىنگى اباي ەسكەرتكىشىنىڭ اشىلۋى – سول كەلىسىمدەردىڭ كورىنىسى, ەكى حالىق اراسىنداعى دوستىق پەن وزارا قۇرمەتتىڭ بەلگىسى دەپ بىلەمىن», – دەدى ايدا بالاەۆا.

ايتا كەتسەك, قازاقتىڭ ۇلى اقىنى ابايدىڭ ەسىمى شەتەلدە زور قۇرمەتكە يە. اقىنعا ارنالعان ەسكەرتكىشتەر, بيۋستەر مەن مونۋمەنتتەر الەمنىڭ كوپتەگەن ىرى قالالارى مەن استانالارىندا ورناتىلعان.

ولاردىڭ قاتارىندا, تاشكەنت, ماسكەۋ, قازان, بىشكەك, بەيجىڭ, كاير, بۋداپەشت, تەگەران, انكارا, ىستامبۇل, نьيۋ-دەلي, جەنەۆا, پاريج, رەنن, ساراەۆو, تبيليسي, بەرلين, سەۋل, حارьكوۆ, باكۋ جانە ريو-دە-جانەيرو قالالارى بار.

ايدا بالاەۆا مەن ەربولات سەمباەۆ شىڭعىس ايتماتوۆ ەسكەرتكىشىنە گۇل شوقتارىن قويدى.