«ا.ي. باراەۆ اتىنداعى استىق شارۋاشىلىعى عىلىمي-وندىرىستىك ورتالىعى» جشس بازاسىندا ەلىمىزدەگى العاشقى كومىرتەكتى اگروكليماتتىق پوليگون – «Kaz Agro Carbon» اشىلدى.

اشىلۋ راسىمىنە قر اۋىل شارۋاشىلىعى مينيسترلىگىنىڭ, قر پرەزيدەنتى جانىنداعى ۇلتتىق عىلىم اكادەميياسىنىڭ, رەسەي فەدەراتسيياسى اۋىل شارۋاشىلىعى مينيسترلىگىنىڭ وكىلدەرى, بۇۇ ازىق-تۇلىك جانە اۋىل شارۋاشىلىعى ۇيىمىنىڭ (فاو) ساراپشىلارى, گاننوۆەر ۋنيۆەرسيتەتىنىڭ عالىمدارى, عىلىمي جانە بىلىم بەرۋ ۇيىمدارىنىڭ باسشىلارى, بيزنەس قاۋىمداستىق وكىلدەرى, وتاندىق جانە شەتەلدىك زەرتتەۋشىلەر, سونداي-اق فەرمەرلەر قاتىستى, دەپ حابارلايدى Shalqar.kz.

جوبا قازاقستان مەن رەسەي اۋىل شارۋاشىلىعى مينيسترلىكتەرىنىڭ جانە قر پرەزيدەنتى جانىنداعى ۇلتتىق عىلىم اكادەميياسىنىڭ قولداۋىمەن, وتاندىق جانە شەتەلدىك عالىمداردىڭ, اۋىل شارۋاشىلىعى قۇرىلىمدارى, سالالىق ۇيىمدار باسشىلارىنىڭ قاتىسۋىمەن جۇزەگە اسىرىلۋدا.

پوليگوننىڭ اشىلۋى قازاقستاندىق-رەسەيلىك اگروونەركاسىپ كەشەنىندەگى وزىق تەحنولوگييالار ورتالىعىنىڭ قىزمەتى شەڭبەرىندە وتتى. ول قر ۇلتتىق عىلىم اكادەميياسى مەن رەسەي عىلىم اكادەميياسىنىڭ اگروەكولوگييا فەدەرالدىق عىلىمي ورتالىعى اراسىنداعى ىنتىماقتاستىق تۋرالى مەموراندۋم اياسىندا قۇرىلعان بولاتىن. كومىرتەكتى پوليگونداردى قۇرۋدىڭ ماقساتى – توپىراقتاعى كومىرتەكتى باسقارۋ, پارنيكتىك گازدار شىعارىندىلارىن ازايتۋ جانە اگرارلىق سەكتوردىڭ كليماتتىق تۇراقتىلىعىن ارتتىرۋ سالالارىندا قازاقستان مەن رەسەي اراسىنداعى عىلىمي ىقپالداستىقتى نىعايتۋ.

«Kaz Agro Carbon» پوليگونى كومىرتەك تەڭگەرىمىن ولشەۋ, مودەلьدەۋ جانە باسقارۋ بويىنشا بىرلەسكەن زەرتتەۋلەر جۇرگىزۋگە ارنالعان پيلوتتىق الاڭعا اينالادى. ەكى ەلدىڭ عالىمدارى سولتۇستىك قازاقستان ەكوجۇيەلەرىندە كومىرقىشقىل گازىنىڭ شىعارىلۋىن ازايتۋ جانە سىڭىرىلۋىن ارتتىرۋعا باعىتتالعان يننوۆاتسييالىق تەحنولوگييالاردى ازىرلەپ, ەنگىزۋدى جوسپارلاپ وتىر.

«كومىرتەكتى اگروكليماتتىق پوليگون «Kaz Agro Carbon»-نىڭ قۇرىلۋى – تۇراقتى اۋىل شارۋاشىلىعىنىڭ جاڭا مودەلىن قالىپتاستىرۋ جولىنداعى ستراتەگييالىق قادام. بۇل جوبا قازاقستان مەن رەسەي اراسىنداعى عىلىمي ىنتىماقتاستىقتى دامىتىپ, اگرووندىرىستەگى كومىرتەك ىزىن ازايتۋعا باعىتتالعان تاجىريبەلىك شەشىمدەردى ەنگىزۋگە مۇمكىندىك بەرەدى», – دەدى ۇلتتىق اگروونەركاسىپتىك عىلىمي-وقىتۋ ورتالىعىنىڭ باسقارما توراعاسى باۋىرجان اسانوۆ.

«كومىرتەكتى پوليگون – عىلىم, يننوۆاتسييا جانە ناقتى وندىرىستى بىرىكتىرەتىن الاڭ. ول توپىراقتىڭ قۇنارلىلىعىن ساقتاۋعا, اۋىل شارۋاشىلىعىن كليماتتىڭ وزگەرۋىنە بەيىمدەۋگە جانە كومىرتەك تەڭگەرىمىن باسقارۋدىڭ ۇلتتىق جۇيەسىن قالىپتاستىرۋعا جول اشادى. بۇل – قازاقستاندا كليماتقا باعىتتالعان ەگىنشىلىكتى دامىتۋدىڭ ماڭىزدى قادامى», – دەدى «ا.ي. باراەۆ اتىنداعى استىق شارۋاشىلىعى عىلىمي-وندىرىستىك ورتالىعى» باسقارما توراعاسى تيمۋر ساۆين.