الماتى وبلىسىندا «قاپشاعاي بيداي ونىمدەرى» اتتى داندى جانە مايلى داقىلداردى تەرەڭ وڭدەۋگە ماماندانعان جاڭا اگروكوكەشەن ىسكە قوسىلدى. سالتاناتتى اشىلۋ راسىمى 1 قاراشا كۇنى قوناەۆ قالاسىندا وتتى. ىس-شاراعا اۋىل شارۋاشىلىعى ۆيتسە-مينيسترى ازات سۇلتانوۆ, وبلىس اكىمى مارات سۇلتانعازيەۆ, سونداي-اق بيزنەس وكىلدەرى مەن قىتايدان كەلگەن سەرىكتەستەر قاتىستى, دەپ حابارلايدى Shalqar.kz.

جاڭا زاۋىت وڭىردىڭ اگرارلىق سەكتورىنداعى ىرى ينۆەستيتسييالىق جوبالاردىڭ بىرى بولىپ تابىلادى. كاسىپورىننىڭ قۋاتتىلىعى جىل سايىن 1 ميلليون توننادان استام دايىن ونىم وندىرۋگە مۇمكىندىك بەرەدى. جالپى ينۆەستيتسييا كولەمى 15 ميلليارد تەڭگەدەن استى. بۇل — قاسكەلەڭ قالاسىنان كەيىنگى الماتى وبلىسىنداعى ەكىنشى وسىنداي وندىرىس ورنى.

وبلىس اكىمى مارات سۇلتانعازيەۆ جاڭا اگروونەركاسىپتىك كەشەننىڭ ىسكە قوسىلۋى اۋىل شارۋاشىلىعى ونىمدەرىن وڭدەۋ سالاسىنىڭ دامۋىنا سەرپىن بەرەتىنىنە توقتالدى:

«الماتى وبلىسى – ەلىمىزدىڭ ەڭ قارقىندى دامىپ كەلە جاتقان ايماقتارىنىڭ بىرى. گەوگرافييالىق تۇرعىدان تيىمدى ورنالاسۋى, ينفراقۇرىلىمنىڭ دامۋى جانە ينۆەستورلارعا جاسالعان قولداۋ اگروونەركاسىپ كەشەنىنىڭ تۇراقتى وسىمىن قامتاماسىز ەتىپ وتىر. بىز قوسىلعان قۇنى جوعارى ونىم شىعاراتىن جانە اۋىل شارۋاشىلىعى ونىمدەرىن وڭدەۋدى دامىتاتىن جوبالاردى ارى قاراي دا قولداي بەرەمىز. «قاپشاعاي بيداي ونىمدەرى» يننوۆاتسييالىق ارى ەكسپورتقا باعىتتالعان وندىرىستىڭ ۇلگىسىنە اينالادى», — دەدى وڭىر باسشىسى.

وز كەزەگىندە اۋىل شارۋاشىلىعى ۆيتسە-مينيسترى ازات سۇلتانوۆ بۇل جوبانىڭ ەل پرەزيدەنتى قويعان ناقتى تاپسىرمامەن ۇشتاساتىنىن اتاپ وتتى:

«اۋىل شارۋاشىلىعى ونىمدەرىن تەرەڭ وڭدەۋ – مەملەكەت باسشىسىنىڭ تاپسىرماسى ارى سالانىڭ باسىم باعىتى. «قاپشاعاي بيداي ونىمدەرى” زاۋىتىنىڭ ىسكە قوسىلۋى بيزنەس پەن مەملەكەتتىڭ ورتاق ماقساتقا – اۋىل شارۋاشىلىعىن تيىمدى ەتۋگە جانە جوعارى قوسىلعان قۇنى بار ونىم وندىرۋگە ۇمتىلىسىن كورسەتەدى. مۇنداي كاسىپورىندار جەرگىلىكتى ەكونوميكانى نىعايتىپ, اگروسەكتوردىڭ باسەكەگە قابىلەتتىلىگىن ارتتىرادى», — دەدى ۆيتسە-مينيستر.

راسىم سوڭىندا قوناقتار زاۋىتتىڭ وندىرىستىك قۋاتىمەن تانىستى. قىزىل تۇيمەنى باسۋ جانە لوكوموتيۆ گۋدوگىن ىسكە قوسۋ ارقىلى كاسىپورىننىڭ جۇمىسى رەسمي تۇردە باستالدى.