حالىقارالىق «جاناشىر» قوعامدىق قورى الماتى قالاسى بىلىم باسقارماسىنا قاراستى الەۋمەتتىك مەكەمەلەر تۇلەكتەرىن بەيىمدەۋ جانە قولداۋ ورتالىعى – «جاستار ۇيىندە» بىرقاتار الەۋمەتتىك جانە تاربيەلىك باعىتتاعى ىس-شارالار ۇيىمداستىردى, دەپ حابارلايدى Shalqar.kz.

اتالعان باستاما حالىقارالىق «جاناشىر» قورى مەن «جاستار ۇيى» مەكەمەسى اراسىنداعى وزارا ارىپتەستىك تۋرالى مەموراندۋم اياسىندا جۇزەگە اسىرىلدى. ىس-شارالاردىڭ نەگىزگى ماقساتى – اتا-انا قامقورلىعىنسىز قالعان جاستارعا رۋحاني جانە ماتەريالدىق قولداۋ كورسەتۋ, ولاردىڭ قوعامعا بەيىمدەلۋىنە جان-جاقتى جاردەمدەسۋ.

شارانى ورتالىق ديرەكتورىنىڭ ورىنباسارى ەركەبۇلان ابدىعاليۇلى اشىپ, جاستاردى ىس-شارا ماقساتىمەن تانىستىردى. سودان سوڭ حالىقارالىق «جاناشىر» قوعامدىق قورىنىڭ  ماماندارى سوز الدى. دومبىرا ۇيرەتۋ, شاحمات, دويبى, شەت تىلدەرىن وقىتۋ كۋرستارىن  ۇيىمداستىرۋعا نيەتتى ەرىكتىلەر, بۇل باعىتتا ورتالىق جاستارىمەن تەگىن جۇمىس ىستەۋگە دايىن ەكەندىكتەرىن ايتتى.