Kaspi.kz جاڭا يننوۆاتسييالىق قىزمەتتەرىن تانىستىردى. قازاقستاندا جاسالعان جاڭا تەحنولوگييالاردىڭ بىرى – Kaspi Alaqan قىزمەتى. ەندى Kaspi كليەنتتەرى الاقان ارقىلى تولەم جاساي الادى. سونداي-اق Kaspi AI قىزمەتى مەن «سىرتقى جارناما» قۇرالى بيزنەس سەرىكتەستەرگە جاڭا مۇمكىندىكتەر اشپاق, دەپ حابارلايدى Shalqar.kz.

اسەرلى كەش, مۋزىكا جانە زاماناۋي جاڭا ونىمدەر – بۇل Kaspi.kz تانىستىرىلىمىنا ارنالعان تەحنولوگييا مەرەكەسى. الماتى تەاترىندا وتكەن شارادا كومپانييا ۇش جاڭا ونىمدى ۇسىندى. سولاردىڭ بىرى – Kaspi Alaqan قىزمەتى. بۇل كومپانييانىڭ تول ازىرلەمەسى. «الاقانمەن تولەم جاساۋ قاۋىپسىز», – دەيدى ماماندار. سەبەبى ار ادامنىڭ الاقانى وزگەشە, ال Kaspi Alaqan ول تۋرالى اقپاراتتى شيفرلانعان تسيفرلىق كودقا اينالدىرادى. بۇل كود Kaspi دەرەكقورىندا ساقتالىپ, كليەنتتى انىقتاۋعا مۇمكىندىك بەرەدى. 

ميحايل لومتادزە, Kaspi.kz باسشىسى جانە نەگىزىن قالاۋشىلاردىڭ بىرى:

-بىز كليەنتتىڭ بەت جۇزى ارقىلى تولەم جاساۋ تەحنولوگيياسىن دا جاسادىق. زەرتتەۋلەر ناتيجەسىندە تولەم جاساۋدىڭ ەڭ جىلدام ارى ەڭ قاۋىپسىز تاسىلى الاقان ارقىلى تولەۋ ەكەنىنە كوز جەتكىزدىك. Kaspi Alaqan تولەم پروتسەسىن بارىنشا جەدەلدەتۋگە مۇمكىندىك بەرەدى, سوندىقتان ەندى تولەم جاساۋ ۇشىن تەلەفون دا, كارتا دا قاجەت بولمايدى.

الاقان ارقىلى العاشقى تولەمدى ارالاس جەكپە-جەك سپورتشىسى شاۆكات راحمونوۆ جاسادى. ول ساحنادا قوناقتاردىڭ كوز الدىندا Kaspi Alaqan ارقىلى تاۋار ساتىپ الدى. جاڭا تەحنولوگييالاردى ىسكە قوسۋدى قولداۋعا كومپانييانىڭ سەرىكتەستەرىمەن قاتار سپورت, مۋزىكا جانە كينو جۇلدىزدارى دا كەلدى.

انگەلينا لۋكاس, بوكستان الەم چەمپيونى:

-كەرەمەت اسەر الدىم. وسىنداي ورتادا بولعانىما قۋانىشتىمىن. قازاقستان ۇشىن Kaspi بىر ۇلكەن وتباسى سيياقتى. مەن 2019 جىلدان بەرى Kaspi كليەنتىمىن. بۇگىن مىنە جاڭا مۇمكىندىكتەردى تانىستىردى. وتە تاڭعالدىم. قازاقستاندا Kaspi ارقىلى تسيفرلىق باعىتتا دامىپ جاتقانىمىزعا وتە قۋانىشتىمىن. 

جاڭا تەحنولوگييانى كەش قوناقتارى دا سىناپ كوردى. قاراپايىم ارى ىڭعايلى قىزمەت بارىنىڭ كوڭىلىنەن شىقتى. Kaspi Alaqan جەلتوقسان ايىنان باستاپ جاپپاي ىسكە قوسىلادى. جاڭا تولەم تۇرى بىرىنشى الماتىدا ەنگىزىلەدى.
كومپانييا ۇسىنعان تاعى بىر جاڭا قىزمەت – Kaspi AI.  بۇل Kaspi دۇكەننىڭ سەرىكتەستەرىنە ارنالعان ينتەللەكتۋالدى كومەكشى. ياعني تاۋاردىڭ ساپالى فوتوسۋرەتىن سالىپ, سيپاتتاماسىن جۇكتەيدى. Kaspi AI قىزمەتىن ىسكە قوسۋ 2026 جىلدىڭ قاڭتارىنا جوسپارلانعان. ال «سىرتقى جارناما» قۇرالى سەرىكتەستەرگە تاۋارىن الەۋمەتتىك جەلىلەردە ىلگەرىلەتۋ مۇمكىندىگىن اشادى. 

ماقسات حالىق, ساراپشى:

-بۇل بەلگىلى بىر دارەجەدە وسى سالادا Kaspi ماگازين دۇكەنىندە ساۋدا جاسايتىن كومپانييالار ۇشىن شاعىن جانە ورتا بيزنەس ۇشىن تاپتىرمايتىن مۇمكىندىك جانە دە تەز تابىس تابۋعا جانە دە تەز وز تاۋارىن وتكىزۋگە جىلجىتۋعا جاڭا مۇمكىندىك الىپ وتىر دەپ ايتۋعا بولادى. دەمەك مۇنىڭ شاعىن جانە ورتا بيزنەستىڭ دامۋىنا قوسار ۇلەسى بار.
 
Kaspi.kz كومانداسى قازاقستان ازاماتتارىنىڭ ومىرىن جاقسارتاتىن جانە ەلدىڭ يننوۆاتسييالار الەمىندەگى ورنىن نىعايتاتىن جاڭا ونىمدەر مەن قىزمەتتەردى جاساپ شىعارا بەرەتىنىن اتاپ وتتى.