Елімізде Мойынты мен Қызылжар станциясын тікелей байланыстыратын жаңа теміржол желісінің құрылысы басталады. Бұл туралы Үкіметтің кеңейтілген отырысында Президенттің тапсырма бергені белгілі. Жаңа бағыт Қазақстанның ішкі логистикасын жақсартумен қатар, Қытай мен Еуропа арасындағы жүк тасымалының әлеуетін арттыруға мүмкіндік береді,деп хабарлайды Shalqar.kz

Сонымен қатар, «Алтынкөл – Жетіген» теміржолының өткізу қабілетін ұлғайту жұмыстары жүргізіледі. Жалпы алғанда, елде ұзындығы 1100 шақырымды қамтитын төрт ірі теміржол құрылысы жүріп жатыр. Олардың қатарына «Достық – Мойынты – Алматы» айналма жолы, «Бақты – Аягөз» және «Дарбаза – Мақтаарал» жобалары кіреді. Биыл «Достық – Мойынты» теміржолының құрылысы аяқталып, бұл учаскенің өткізу қабілеті бес есе артады деп күтілуде.

ҚР Көлік министрлігі Теміржол және су көлігі комитеті төрағасының орынбасары Нұржан Келбұғановтың айтуынша, Мойынтыдан Қызылжарға дейінгі жаңа желінің ұзындығы 366 шақырымды құрайды. Сонымен қатар, Қызылжардан Сексеуілге дейін 700 шақырымдық теміржолға, Шалқардан Бейнеуге дейін 470 шақырымдық бағытқа және Бейнеу мен Ақтау арасындағы желіге заманауи жүйелер енгізілмек. Жаңа разъездер салынып, инфрақұрылым жаңғыртылады.

Өткен жылы елімізде 1400 шақырым теміржол жөндеуден өтті. Жобалар аясында 2700 жұмыс орны ашылып, 143 жолаушылар вагоны, 800 жүк вагоны сатып алынды. Сондай-ақ, 185 жаңа локомотив қолданысқа берілді.