Қазақстан журналистер одағы (ҚЖО) түрік бұқаралық ақпарат құралдарымен меморандумға қол қойды, деп хабарлайды Shalqar.kz.

Алматыда сәрсенбі күні Ұлттық баспасөз клубының кеңсесінде Қазақстан журналистер одағының төрағасы Сейтқазы Матаев құрамында Түрік әлемі журналистер федерациясының төрағасы Мандерис Демир, Түркия журналистер федерациясының төрағасы Йылмаз Караджа, Түрік интернет-медиа қауымдастығының президенті Сүлейман Баса, өзбек медиа өкілі Миазамхон Ибрагимова, журналистика факультетінің деканы профессор Айне Элиф Кая, Қазақстандағы Түркия консулдығының қызметкерлері және БАҚ өкілдері бар делегациямен кездесті.

Сейтқазы Матаев Қазақстан журналистер одағының қызметі туралы, сондай-ақ түркітілдес елдермен жұмыстың перспективалары туралы айтты.

Спикерлердің барлығы зорлық-зомбылық, терроризм және жалған ақпаратты насихаттауға қарсы журналистер күшін біріктірудің маңыздылығы туралы бірауыздан пікір білдірді.

Түркітілдес елдердің медиа саласын дамыту перспективалары, балалар мен жастарды тәрбиелеу, оларға отбасылық құндылықтарды дарыту, ұлан-ғайыр еуразиялық кеңістікті мекендейтін халықтардың салт-дәстүрлерін зерттеу мәселелері талқыланды.

Журналистік ұйым басшылары көпжақты ынтымақтастыққа қатысты бірнеше ұсыныс айтты.

Кездесу қорытындысында Қазақстан журналистер одағы мен түрік БАҚ-тары арасында Ынтымақтастық туралы меморандумға қол қойылды. Конференция қатысушылары бұл шараны бауырлас халықтардың медиа саласының дамуындағы жаңа кезеңнің бастауы деп атады.