كيبەرشابۋىل جاس تالعامايدى. قازىر الاياقتار بالالارعا دا «تىس سالا» باستادى, دەپ حابارلايدى Shalqar.kz. ەلدە جاسوسپىرىمدەرگە زيياندى ارى زاڭعا قايشى كونتەنتى بار 38 مىڭنان استام ينتەرنەت-رەسۋرس بۇعاتتالعان. ەندىگى ماسەلە بالالاردىڭ كيبەرقاۋىپسىزدىگىن كىم قامتاماسىز ەتەدى? قايتپەك كەرەك? «كيبەرقاداعالاۋ» جۇيەسى ارقىلى بالالارعا زيياندى كونتەنتى بار 38 مىڭنان اسا ينتەرنەت-رەسۋرس انىقتالىپ, بۇعاتتالدى. ماماندار جاسوسپىرىمدەردىڭ تسيفرلىق ورتادا بەلسەندىلىگى ارتقانىن ايتادى. كەيدە مۇنىڭ بارىن باقىلاۋ قيىنداپ كەتەدى. ايتسە دە ار وتباسى كيبەرگيگيەنانى ساقتاۋ ماڭىزدى. ابىلاي يسين, ساراپشى: - كيبەرساۋات دەگەنىمىز نە? مۇنى ەڭ بىرىنشى اتا-انالار جاقسى تۇسىنۋى كەرەك. مىسالى Egov پورتالىندا كيبەرگيگيەناعا بايلانىستى 20 شاقتى ۆيدەو جۇكتەلگەن. سونى اربىرىڭىز قاراپ شىعىڭىز. كيبەرساۋاتتى بولماي, بىز بالالارىمىزدى قورعاي المايمىز. بىراق تىيىم سالماۋ كەرەك, ويتكەنى بالالار تىيعان نارسەگە اۋەس كەلەتىنى بەلگىلى. سول سەبەپتى ونىڭ دۇرىس-بۇرىسىن ۇدايى تۇسىندىرىپ وتىرۋ قاجەت. كۇزدە دروپپەرلەردى جازالاۋ زاڭدى كۇشىنە ەندى. تەك بۇل دا الاياقتاردى توقتاتار ەمەس. ەندى ولار وزىنىڭ قۇيتىرقى ارەكەتىنە بالالاردى ارالاستىرا باستادى. اسىرەسە جاس ورەننىڭ پسيحولوگييالىق كۇيىمەن وينايتىندار كوپ. وكىنىشكە قاراي, تۇرلى سىلتەمەگە وتىپ, جەكە دەرەكتەردى تاراتۋدىڭ سالدارى بار. مۇنى اتا-انانىڭ وزى بىلمەي جاتادى. مىسالى, دروپپەرلىككە ىلىككەن بالانىڭ اكە-شەشەسى جاۋاپكەرشىلىككە تارتىلاتىنىن ۇمىتپاڭىز. الەۋمەتتىك جەلىلەر, تۇرلى ۆيرتۋالدى ويىندار, جالعان سايتتار. بالا تۇرماق, ۇلكەننىڭ وزىن ارباپ الاتىن تسيفلىق الەمنەن قاشىپ قۇتىلا المايمىز. بۇل دا ومىر سالتىمىزعا اينالعانى راس. تاياۋدا ىىم زاڭعا قايشى كونتەنت ۇشىن جاۋاپكەرشىلىك جۇكتەۋ جايىن كوتەرگەن ەدى. ەلدە «بالالاردى دەنساۋلىعى مەن دامۋىنا زاردابىن تيگىزەتىن اقپاراتتان قورعاۋ تۋرالى» زاڭ بار. ونىڭ اياسىندا مەملەكەتتىك ورگانداردىڭ وكىلەتتىكتەرىن, سونداي-اق قاۋىپتى كونتەنتكە مونيتورينگ جۇرگىزۋ, تالداۋ جانە بۇعاتتاۋ تەتىكتەرى ايقىندالادى. ال بالاعا تەحنيكالىق شەكتەۋ جاساۋ, قاتەلىك ەكەنىن ايتتىق. سول سەبەپتى كىشكەنتايلارعا بوتەن ەمەس, وزىڭىز جاقىن بولىڭىز. وزگەنىڭ سەبەپسىز ۇسىنىسى ەرتەڭ وپىق جەگىزەتىنىن بالا دا ۇعىنۋى تيىس.