جىل سايىن قازاقستاندا جرۆي-مەن 3-4 ملن ادام, ال تۇماۋمەن 2 مىڭ ادام اۋىرادى, دەپ حابارلايدى Shalqar.kz “قازاقستان رەسپۋبليكاسىنىڭ پرەزيدەنتى جانىنداعى ورتالىق كوممۋنيكاتسييالار قىزمەتىنە” سىلتەمە جاساپ. اعىمداعى ەپيدەميولوگييالىق ماۋسىم باستالعاننان بەرى ەلدە جرۆي-دىڭ 1,5 ملن جاعدايى تىركەلدى. وتكەن جىلدىڭ سايكەس كەزەڭىمەن سالىستىرعاندا بۇل كورسەتكىش 20%-عا تومەن. بۇل تۋرالى وكق الاڭىندا وتكەن باسپاسوز ماسليحاتىندا قر دەنساۋلىق ساقتاۋ بىرىنشى ۆيتسە-مينيسترى تيمۋر سۇلتانعازيەۆ مالىمدەدى.

14 جاسقا دەيىنگى بالالار اراسىندا 1 ميلليونعا جۋىق جاعداي تىركەلگەن. ەپيدەمييالىق ماۋسىم باستالعاننان بەرى تۇماۋدىڭ 590 جاعدايى زەرتحانالىق تۇرعىدان راستالدى. سونداي-اق ا تيپتى تۇماۋدىڭ 587 جاعدايى تىركەلدى. 

جاقىندا الەۋمەتتىك جەلىلەردە گونكونگ دەپ اتالاتىن ۆيرۋستىڭ تارالۋى تۋرالى قاۋەسەتتەر بەلسەندى تۇردە تارالۋدا, بۇل حالىق اراسىندا تۇماۋدىڭ جاڭا ەرەكشە شتاممىنىڭ پايدا بولۋى تۋرالى قاتە وي تۋعىزادى. وسىعان بايلانىستى رەسمي تۇسىنىكتەمە بەرگىم كەلەدى: كوبىنەسە گونكونگ دەپ اتالاتىن ا (H3N2) تۇماۋى جاڭا ۆيرۋس ەمەس. ول العاش رەت 1968 جىلى انىقتالدى. سول كەزدەن باستاپ ول الەم بويىنشا ۇنەمى اينالىمدا بولدى. قازاقستان رەسپۋبليكاسىنىڭ اۋماعىندا بۇل ۆيرۋس كوپ جىل بويى بار. ونى مەرزىمدى تىركەۋ ماۋسىمدىق ەپيدەميولوگييالىق پروتسەستىڭ بىر بولىگى بولىپ تابىلادى», – دەپ تۇسىندىردى سپيكەر.

قر دەنساۋلىق ساقتاۋ بىرىنشى ۆيتسە-مينيسترىنىڭ ايتۋىنشا, اعىمداعى جىلى تۇماۋ اينالىمى قازان ايىنىڭ بىرىنشى جارتىسىندا باستالدى. ياعني, وتكەن جىلعى ەپيدەميولوگييالىق ماۋسىمنان سال ەرتەرەك. بۇرىن قازاقستان اۋماعىندا اينالىمدا بولماعان تۇماۋدىڭ جاڭا تۇرلەرى انىقتالعان جوق. 

تيمۋر سۇلتانعازيەۆ انىقتالعان ۆيرۋستار اعىمداعى ماۋسىمنىڭ ۆاكتسينا شتاممدارىنا تولىق سايكەس كەلەتىندىگىن, بۇل ۆاكتسينالاۋدى اۋرۋدىڭ كۇردەلى تۇرلەرىنىڭ الدىن الۋدا ەرەكشە وزەكتى جانە تيىمدى ەتەتىندىگىن اتاپ وتتى. بۇگىندە ەلىمىزدە تۇماۋعا قارسى 2,1 ملن ادام ەكپە الدى.

سونىمەن قاتار دەنساۋلىق ساقتاۋ مينيسترلىگى تۇماۋعا قاتىسى جوق ۆيرۋستاردىڭ اينالىمىنا مونيتورينگ جۇرگىزۋدە. جالپى ەل بويىنشا 3 مىڭنان استام ۇلگى زەرتتەلدى. ناتيجەسىندە تۇرلى ۆيرۋستىڭ, سونىڭ ىشىندە رينوۆيرۋس, پاروگريپپ, ادەنوۆيرۋس, بوكوۆيرۋس, كوروناۆيرۋس, رس ۆيرۋسىنىڭ اينالىمى انىقتالدى.

«جالپى جرۆي-مەن اۋىراتىنداردىڭ 66%-ى – بالالار, 34%-ى – ەرەسەكتەر. سوڭعى اپتادا ەلدە جرۆي-دىڭ 183 مىڭ جاعدايى تىركەلدى. بىر اپتا ىشىندە وقۋشىلار اراسىندا جرۆي-دىڭ 6 مىڭنان استام جاعدايى جانە تۇماۋدىڭ 13 جاعدايى تىركەلدى. جرۆي-مەن اۋىراتىن ناۋقاستاردىڭ جالپى سانىنىڭ 4%-ى – مەكتەپ وقۋشىلارى», – دەپ تولىقتىردى سپيكەر.