الماتى مەن استانانىڭ جەدەل جاردەم قىزمەتكەرلەرىن بەينەتىركەگىشپەن قامتاماسىز ەتكەننەن كەيىن كەلەڭسىز وقيعالار 90 پايىزعا ازايدى, دەپ حابارلايدى Shalqar.kz. بۇل تۋرالى دەنساۋلىق ساقتاۋ بىرىنشى ۆيتسە-مينيسترى تيمۋر سۇلتانعازيەۆ ايتتى.

— تۇرلى وقيعالاردىڭ الدىن الۋ ۇشىن ىشكى ىستەر مينيسترلىگىمەن بىرگە جوسپار جاسادىق. سول جوسپاردىڭ اياسىندا قابىلداۋ بولمەلەرىندە 150-گە جۋىق پوليتسييا بەكەتىن اشتىق. سونىمەن قاتار ستايتسونارلاردا كامەرالار ورناتىپ جاتىرمىز. كامەرالار پوليتسييانىڭ جەدەل باسقارۋ ورتالىعىنا قوسىلعان. مۇنان بولەك, 600 مەديتسينا ۇيىمنىڭ اربىر قابىلداۋ بولمەسىنە دابىل نۇكتەلەرىن ورناتقان ەدىك. سونىڭ ارقاسىندا قاجەتتى جەدەل الدىن الۋ شارالارىن قولعا الۋ كوزدەلگەن, — دەدى ۆيتسە-مينيستر ماجىلىستىڭ جالپى وتىرىسىندا دەپۋتاتتاردىڭ ساۋالىنا وراي.

ونىڭ ايتۋىنشا, بيىل الماتى مەن استانا قالالارىندا جەدەل جاردەم قىزمەتكەرلەرى بەينەتىركەگىشپەن قامتاماسىز ەتىلدى. 

— ناتيجەسىندە تۇرلى كەلەڭسىز وقيعالاردىڭ 90 پايىزعا كەمىگەنىن كورىپ وتىرمىز. اتالعان تاجىريبەنى قازاقتەلەكوممەن بىرگە كەڭەيتىپ, ەلىمىزدەگى بارلىق جەدەل جاردەم قىزمەتكەرلەرىن بەينەتىركەگىشپەن قامتاماسىز ەتۋ ويىمىزدا بار, — دەدى تيمۋر سۇلتانعازيەۆ. 

ايتا كەتەيىك, ماجىلىس وتىرىسىندا دارىگەرلەر مەن جەدەل جاردەم قىزمەتكەرلەرىن قورعاۋعا ارنالعان زاڭ جوباسى تالقىلانىپ جاتىر.