وش قالاسىندا (قىرعىز رەسپۋبليكاسىنىڭ ىرى اكىمشىلىك ورتالىقتارىنىڭ بىرى) اباي قۇنانبايۇلى اتىنداعى كوشە, ەسكەرتكىش جانە مۋزەيدىڭ سالتاناتتى اشىلۋ راسىمى وتتى, دەپ حابارلايدى Shalqar.kz “مادەنيەت جانە اقپارات مينيسترلىگىنىڭ” تەلەگرامم كانالىنا سىلتەمە جاساپ.

ىس-شاراعا قازاقستان رەسپۋبليكاسىنىڭ مادەنيەت جانە اقپارات مينيسترى ايدا بالاەۆا, قىرعىزستاننىڭ مادەنيەت, اقپارات, سپورت جانە جاستار ساياساتى مينيسترىنىڭ ورىنباسارى اسكارالى مادامينوۆ, وش قالاسىنىڭ مەرى جەنيشبەك توكتورباەۆ, سونداي-اق ديپلوماتييالىق كورپۋس پەن شىعارماشىلىق زييالى قاۋىم وكىلدەرى قاتىستى.

اشىلۋ سالتاناتىندا ايدا بالاەۆا قاتىسۋشىلارعا العىس بىلدىرىپ, بۇل باستامانىڭ ەرەكشە ماڭىزىنا توقتالدى.

«بيىل تامىز ايىندا بىشكەك قالاسىندا ۇلى قالامگەرلەر مۇحتار اۋەزوۆ پەن شىڭعىس ايتماتوۆقا ارنالعان كومپوزيتسييالىق ەسكەرتكىش اشىلعان بولاتىن. سول يگى داستۇردى بۇگىن وش جەرىندە ابايدىڭ ەسىمىمەن جالعاستىرىپ وتىرمىز. سوندىقتان بۇگىن اشىلىپ وتىرعان ەسكەرتكىش, كوشە جانە مۋزەي – تەك مادەني نىساندار عانا ەمەس. بۇل – ەكى ەلدىڭ باۋىرلاستىعىن, رۋحاني ساباقتاستىعىن جانە وزارا قۇرمەتىن كورسەتەتىن ماڭگىلىك بەلگى, ۇرپاقتى بىلىم مەن پاراساتقا جەتەلەيتىن ورتاق قۇندىلىق ەكەنى سوزسىز», – دەدى مينيستر.

ايدا بالاەۆا ەكى ەل باسشىلارى ەكىجاقتى قاتىناستاردى دامىتۋعا ايرىقشا ۇلەس قوسىپ جۇرگەن قوعام قايراتكەرلەرى مەن ساياسي تۇلعالاردىڭ ەڭبەگىن جوعارى باعالايتىنىن اتاپ وتتى. سونىمەن قاتار مەملەكەت باسشىسىنىڭ ارنايى جارلىعىمەن وش قالاسىنىڭ مەرى جەنيشبەك توكتورباەۆقا قازاقستان رەسپۋبليكاسىنىڭ مەملەكەتتىك ناگراداسى – II دارەجەلى «دوستىق» وردەنى تابىستالدى.

مينيستردىڭ ايتۋىنشا, كەيىنگى جىلدارى قازاقستان مەن قىرعىزستاننىڭ مادەني-گۋمانيتارلىق ىنتىماقتاستىعى جاڭا سەرپىنمەن دامىپ كەلەدى. بىرلەسكەن كورمەلەر, تەاتر گاسترولьدەرى, ادەبي جانە جاستار فورۋمدارى, زەرتتەۋشىلەر كونفەرەنتسييالارى وتكىزىلۋدە. سونداي-اق مادەنيەت مەكەمەلەرىنىڭ ارىپتەستىگى نىعايىپ, يۋنەسكو اياسىنداعى باعدارلامالار شەڭبەرىندە وزارا قولداۋ كۇشەيىپ وتىر.

بۇدان بولەك, جۇمىس ساپارى بارىسىندا مينيستر قىرعىزستانداعى ەڭ ىرى مۋزەيلەردىڭ بىرى, يۋنەسكو-نىڭ بۇكىلالەمدىك مۇرا تىزىمىنە ەنگەن «سۋلايمان-توو» ۇلتتىق تاريحي-ارحەولوگييالىق مۋزەي-قورىعىنا باردى.