Oş qalasında (Qırğız Respublikasınıñ iri äkimşilik ortalıqtarınıñ biri) Abay Qwnanbaywlı atındağı köşe, eskertkiş jäne muzeydiñ saltanattı aşılu räsimi ötti, dep habarlaydı Shalqar.kz “Mädeniet jäne aqparat ministrliginiñ” telegramm kanalına silteme jasap.

İs-şarağa Qazaqstan Respublikasınıñ Mädeniet jäne aqparat ministri Aida Balaeva, Qırğızstannıñ Mädeniet, aqparat, sport jäne jastar sayasatı ministriniñ orınbasarı Askaralı Madaminov, Oş qalasınıñ meri Jenişbek Toktorbaev, sonday-aq diplomatiyalıq korpus pen şığarmaşılıq ziyalı qauım ökilderi qatıstı.

Aşılu saltanatında Aida Balaeva qatısuşılarğa alğıs bildirip, bwl bastamanıñ erekşe mañızına toqtaldı.

«Biıl tamız ayında Bişkek qalasında wlı qalamgerler Mwhtar Äuezov pen Şıñğıs Aytmatovqa arnalğan kompoziciyalıq eskertkiş aşılğan bolatın. Sol igi dästürdi bügin Oş jerinde Abaydıñ esimimen jalğastırıp otırmız. Sondıqtan bügin aşılıp otırğan eskertkiş, köşe jäne muzey – tek mädeni nısandar ğana emes. Bwl – eki eldiñ bauırlastığın, ruhani sabaqtastığın jäne özara qwrmetin körsetetin mäñgilik belgi, wrpaqtı bilim men parasatqa jeteleytin ortaq qwndılıq ekeni sözsiz», – dedi ministr.

Aida Balaeva eki el basşıları ekijaqtı qatınastardı damıtuğa ayrıqşa üles qosıp jürgen qoğam qayratkerleri men sayasi twlğalardıñ eñbegin joğarı bağalaytının atap ötti. Sonımen qatar Memleket basşısınıñ arnayı Jarlığımen Oş qalasınıñ meri Jenişbek Toktorbaevqa Qazaqstan Respublikasınıñ memlekettik nagradası – II därejeli «Dostıq» ordeni tabıstaldı.

Ministrdiñ aytuınşa, keyingi jıldarı Qazaqstan men Qırğızstannıñ mädeni-gumanitarlıq ıntımaqtastığı jaña serpinmen damıp keledi. Birlesken körmeler, teatr gastrol'deri, ädebi jäne jastar forumdarı, zertteuşiler konferenciyaları ötkizilude. Sonday-aq mädeniet mekemeleriniñ äriptestigi nığayıp, YUNESKO ayasındağı bağdarlamalar şeñberinde özara qoldau küşeyip otır.

Bwdan bölek, jwmıs saparı barısında ministr Qırğızstandağı eñ iri muzeylerdiñ biri, YUNESKO-nıñ Bükilälemdik mwra tizimine engen «Sulayman-Too» wlttıq tarihi-arheologiyalıq muzey-qorığına bardı.