بۇگىن استانادا قازاقستاندىق قوعامدىق دامۋ ينستيتۋتى قر مادەنيەت جانە اقپارات مينيسترلىگىنىڭ تاپسىرىسى بويىنشا دايىندالعان «قازاقستان رەسپۋبليكاسىندا وتباسىلىق-تۇرمىستىق زورلىق-زومبىلىقتىڭ الدىن الۋ» ۇلتتىق بايانداماسىن تانىستىردى, دەپ حابارلايدى Shalqar.kz “مادەنيەت جانە اقپارات مينيسترلىگىنىڭ” تەلەگرامم كانالىنا سىلتەمە جاساپ.

ىس-شارا ايەلدەر مەن قىزدارعا قاتىستى زورلىق-زومبىلىقپەن كۇرەسۋگە ارنالعان «گەندەرلىك زورلىق-زومبىلىققا قارسى 16 كۇن» حالىقارالىق ناۋقانى اياسىندا وتتى. بۇل ناۋقان 25 قاراشا مەن 10 جەلتوقسان ارالىعىندا بۇۇ باستاماسىمەن بۇكىل الەمدە وتەدى. ماقساتى – زورلىق-زومبىلىق پروبلەماسىنا نازار اۋدارۋ, جابىر كورگەن ادامداردى قولداۋ جانە قوعامدى اقپاراتتاندىرۋ.

باسقوسۋعا قر پرەزيدەنتى جانىنداعى ايەلدەر ىستەرى جانە وتباسىلىق-دەموگرافييالىق ساياسات جونىندەگى ۇلتتىق كوميسسييا, ورتالىق جانە جەرگىلىكتى مەملەكەتتىك ورگاندار, عىلىمي-ساراپتامالىق قاۋىمداستىق وكىلدەرى قاتىستى.

ىس-شارا بارىسىندا قر مادەنيەت جانە اقپارات ۆيتسە-مينيسترى ەۆگەنيي كوچەتوۆ سوز سويلەپ, باياندامانىڭ مانى مەن ماڭىزىنا توقتالدى.

ىس-شارا بارىسىندا ۇلتتىق باياندامانىڭ نەگىزگى ناتيجەلەرى تانىستىرىلىپ, وتباسىلىق-تۇرمىستىق زورلىق-زومبىلىقتىڭ الدىن الۋ, زاڭنامانى جەتىلدىرۋ, سونداي-اق وتباسىن قورعاۋعا باعىتتالعان مەملەكەتتىك ورگانداردىڭ, وتباسىن قولداۋ ورتالىقتارىنىڭ, داعدارىس ورتالىقتارى مەن قوعامدىق ۇيىمداردىڭ رولى تالقىلاندى.

بايانداما دەرەكتەرىن ساراپشىلار مەن مەملەكەتتىك ورگاندار نەگىزگە الا وتىرىپ, كەڭىنەن پايدالانادى. ال وندا كورسەتىلگەن ۇسىنىمدار ستراتەگييالىق جانە نورماتيۆتىك قۇجاتتاردى ازىرلەۋ كەزىندە ەسكەرىلەدى.

كەيىنگى جىلدارى تۇرمىستىق زورلىق-زومبىلىق تاقىرىبىنىڭ اۋقىمى ارتىپ, ۆەدومستۆوارالىق ماسەلە مەن قوعامدىق تالقىلاۋدىڭ وزەگىنە اينالدى.

2024 جىلى زاڭناماعا ەنگىزىلگەن وزگەرىستەر بىرقاتار اكىمشىلىك قۇقىقبۇزۋشىلىقتاردى قىلمىستىق ساناتقا اۋىستىرىپ, جابىرلەنۋشىلەردى قورعاۋدى كۇشەيتتى.

وتباسىلىق-تۇرمىستىق زورلىق-زومبىلىق تۋرالى زاڭدا اگرەسسورلار ۇشىن مىندەتتى تۇزەتۋ باعدارلامالارى قاراستىرىلعان, سونداي-اق وتباسىن قولداۋ ورتالىقتارىنىڭ فۋنكتسييالارى بەكىتىلگەن.

زاڭ اياسىندا مينيسترلىك وتباسىن قولداۋ ورتالىقتارىنىڭ قىزمەتىن ۇيلەستىرىپ, ولارعا ادىستەمەلىك باعىت بەرەدى.

بۇل ورتالىقتار مەملەكەتتىك وتباسىلىق ساياساتتى ىسكە اسىرادى, سونىڭ ىشىندە وتباسىن ساقتاۋ, جانۇياداعى جانجالداردى شەشۋ, ومىرلىك قيىن جاعدايعا تاپ بولعان وتباسىلارعا قولداۋ كورسەتۋ, سونداي-اق تۇرمىستىق زورلىق-زومبىلىقتىڭ الدىن الۋ شارالارى بار.

زاڭ قابىلدانعاننان كەيىن وتباسىن قولداۋ ورتالىقتارىنىڭ سانى تورت ەسە وسىپ, 33-تەن 131-گە جەتتى.