Bügin Astanada «Darın» memlekettik jastar sıylığınıñ laureattarın marapattau räsimi ötti, dep habarlaydı Shalqar.kz “Mädeniet jäne aqparat ministrliginiñ” telegramm kanalına silteme jasap. Sıylıq mädeniet, ğılım, media jäne sport salasında joğarı jetistikterge jetken 20 jas darınğa tabıstaldı.

Olardıñ qatarında halıqaralıq jäne respublikalıq konkurstar, festival'der men körmelerdiñ laureattarı, respublikalıq jäne halıqaralıq deñgeydegi sport jarıstarınıñ jüldegerleri men jeñimpazdarı, qoğamnıñ damuına üles qosıp jürgen jastar bar.

QR Mädeniet jäne aqparat ministri Aida Balaeva qwttıqtau sözinde jastar sayasatı salasında jıl sanap jaña buındı qoldauğa bağıttalğan şaralar men jobalar artıp kele jatqanın atap ötti. Prezident bastaması arqılı joğarı bilimniñ qoljetimdiligi artıp, jas ğalımdardı qoldauğa arnalğan grant bağdarlamaları köbeydi, eñbek narığında jas mamandardıñ mümkindikterin arttıratın jaña jobalar iske qosıldı.

Kreativti industriya, cifrlıq ekonomika, käsipkerlik salasında jastarğa jol aşatın bastamalar da memleket tarapınan qoldau tauıp otır.

«Memleket basşısı ärdayım öz sözderinde jastarğa qoldau bildirip, ülken senim artıp keledi. Prezidenttiñ är Joldauı, qolğa alğan reformaları men bastamaları – jastardıñ bolaşağı men igiligi üşin jasalıp jatqan auqımdı özgeristerdiñ naqtı körinisi.

Bwl reformalardıñ özegi – Ädildik, Zañ men tärtip, aşıqtıq pen jauapkerşilik sekildi qwndılıqtarğa negizdelgen. Äsirese, «Zañ jäne tärtip», «Taza Qazaqstan» bastamaları men jappay volonterlik akciyalardı jastardıñ zor jauapkerşilikpen jäne ülken ıntamen qoldap kele jatqanı quantadı. Bwl auqımdı bastamalardıñ barlığı – jaña ideologiyanıñ mañızdı böligi. Al osı ideologiyanı jüzege asıratın da, onı alğa jeteleytin de – özderiñiz», – dedi ministr.

Laureattar «Ğılım», «Estrada», «Klassikalıq muzıka», «Halıq şığarmaşılığı», «Sport», «Dizayn jäne beyneleu öneri», «Jurnalistika», «Qoğamdıq qızmet», «Teatr jäne kino», «Ädebiet» nominaciyaları boyınşa anıqtaldı.

2025 jılğı jeñimpazdardıñ qatarında tanımal qazaqstandıq änşi Eñlik Qwrarbek (Yenlik), «Slavyan bazarı-2024» halıqaralıq vokaldıq bayqauınıñ bas jüldegeri Ernazar Jwban, «Qayrat» futbol klubınıñ şabuılşısı Dastan Sätpaev bar.

«Darın» memlekettik jastar sıylığı jıl sayın talanttı jastardı memlekettik deñgeyde qoldau maqsatında tabıstaladı. Sıylıq ğılımi, şığarmaşılıq, qoğamdıq qızmettegi jetistikter men joğarı sporttıq nätijeler üşin beriledi.

30 jıldan astam uaqıt işinde bwl sıylıqtı 360-tan asa jas qazaqstandıq ielengen. Osığan deyin Nwrlan Önerbaev, Baqtiyar Artaev, Serik Säpiev, Daniyar Eleusinov, Il'ya Il'in, Ol'ga Şişigina, Denis Ten, Qıdıräli Bolmanov, «MuzART», «Bäyterek» toptarı, Serik Ibragimov, Äli Oqapov, Qayrat Nwrtas, Dimaş Qwdaybergen jäne tağı basqa köptegen önerpazdar men sportşılar marapattalğan.