Әлемдік деңгейдегі қазақстандық боксшы Жәнібек Әлімханұлының кезекті жекпе-жегі Астанада өтуі мүмкін. Top Rank промоутерлік компаниясы ұйымдастыратын бокс кеші 2025 жылғы 5 сәуірге жоспарланған, деп хабарлайды “Shalqar.kz” сайты.

Сарапшылардың болжамынша, Жәнібектің келесі шаршы алаңы елордада өтеді деген үміт бар. Бұл жаңалық жанкүйерлердің қызығушылығын арттырып, үлкен талқыға түсті.

Еске сала кетейік, Әлімханұлы бұған дейін абсолютті чемпион болуға ұмтылатынын ашық мәлімдеген еді. Ол соңғы рет 2024 жылдың 4 қазанында Сиднейде өткен жекпе-жекте жаңазеландиялық Андрей Михайловичті (21-1, 13 КО) тоғызыншы раундта нокаутқа түсіріп, өз күшін тағы бір дәлелдеді.

Бұл жекпе-жек шынымен де Астанада өтсе, отандық жанкүйерлер үшін үлкен оқиға болары сөзсіз.