2025 جىلدىڭ سوڭعى ايى قازاقستاندىقتارعا 9 دەمالىس كۇنىن سىيلايدى. سەنبى-جەكسەنبى كۇندەرىنەن بولەك سەيسەنبىدە تاۋەلسىزدىك كۇنىنە وراي تاعى بىر كۇن دەمالامىز. ال 30 جانە 31 جەلتوقسان جۇمىس كۇندەرى بولىپ قالا بەرەدى. ەندەشە, قىستىڭ العاشقى ايى قازاقستاندىقتار ۇشىن تاعى قانداي جاڭالىقتار مەن وزگەرىستەر اكەلمەك? Shalqar.kz تىلشىسى جەلتوقساندا كۇتەتىن ماڭىزدى اقپاراتتاردى توپتاستىردى.

ەندى قازاقستاندىقتار اۆتوليزينگ راسىمدەي الادى.

1 جەلتوقساننان باستاپ قازاقستان ازاماتتارى ۇشىن اۆتوليزينگتەر قولجەتىمدى بولادى. بۇعان دەيىن ليزينگتى نەگىزىنەن تەك كومپانييالار پايدالانا الاتىن. ەندى قاراپايىم ازاماتتار دا جەڭىل اۆتوكولىكتى ليزينگكە راسىمدەپ, كەيىن ونى تولىق ساتىپ الۋعا نەمەسە كولىكتى كومپانيياعا قايتا وتكىزۋگە مۇمكىندىك الادى.

ماجىلىس دەپۋتاتى, Respublica پارتيياسىنىڭ وكىلى ولجاس قۇسبەكوۆتىڭ ايتۋىنشا, بۇل باستاما قر پرەزيدەنتى قاسىم-جومارت توقاەۆتىڭ حالىقتىڭ الەۋمەتتىك جۇكتەمەسىن ازايتۋ جونىندەگى تاپسىرماسى اياسىندا ىسكە اسىرىلىپ وتىر. دەپۋتاتتىڭ سوزىنشە, اۆتوليزينگ باعدارلاماسى بۇرىن جەڭىلدەتىلگەن اۆتونەسيە الا الماعان ازاماتتارعا باعىتتالعان.

"بىزدىڭ مىندەت – ليزينگتىڭ جاي عانا باسقا شارتتارمەن بەرىلەتىن اۆتوكرەديتكە اينالىپ كەتپەۋىن قاداعالاۋ. ول شىنىمەن دە حالىققا ىڭعايلى, يكەمدى قارجى قۇرالى بولۋعا تيىس", – دەدى قۇسبەكوۆ.

جاڭا اۋە رەيستەرى مەن لوۋكوستەرلەر پايدا بولادى.

جەلتوقساننان باستاپ قازاقستاننىڭ اۋە نارىعىندا تايلاندتىڭ جاڭا لوۋكوستەرى – Thai AirAsia X جۇمىسىن باستايدى. اۋە كومپانيياسى بانگكوك – الماتى باعىتى بويىنشا تىكەلەي تۇراقتى رەيستەردى اپتاسىنا تورت رەت ورىندايدى: دۇيسەنبى, سارسەنبى, بەيسەنبى جانە جەكسەنبى كۇندەرى.

ازاماتتىق اۆياتسييا كوميتەتىنىڭ مالىمەتىنشە, ۇشۋ گەوگرافيياسىن كەڭەيتۋ جانە حالىقارالىق رەيستەر سانىن ارتتىرۋ باعىتىنداعى جۇمىس جالعاسىپ جاتىر.

سونىمەن قاتار, 18 جەلتوقساننان باستاپ بەلارۋسьتىڭ «بەلاۆيا» اۋە كومپانيياسى مينسك – الماتى باعىتىنداعى رەيستەرىن قايتا جاڭعىرتادى. بۇل تۋرالى كومپانييانىڭ باس ديرەكتورى يگورь چەرگينەتس حابارلادى. بۇعان دەيىن بۇل رەيس ورىندالعان, سۇرانىستا جيى بولعان, بىراق كەيىنىرەك توقتاتىلعان ەدى.

الماتىدان تاشكەنتكە Talgo پويىزىمەن بارۋعا بولادى.

14 جەلتوقساننان باستاپ «جولاۋشىلار تاسىمالى» اق الماتى – تاشكەنت باعىتى بويىنشا كۇندەلىكتى جۇرەتىن Talgo پويىزىن ىسكە قوسادى. مارشرۋتتا جايلىلىق دەڭگەيى جوعارى Talgo قۇرامدارى پايدالانىلماق. كۇن سايىن جۇرۋ كەستەسى جولاۋشىلارعا ساپارلارىن الدىن الا ىڭعايلى جوسپارلاۋعا مۇمكىندىك بەرەدى.

جولدا جۇرۋ ۋاقىتى – 17 ساعات 38 مينۋت.

شامامەن بيلەت باعالارى:

وتىراتىن ۆاگوندار – 10 167 تەڭگەدەن,

كۋپە – 20 711 تەڭگە,

ليۋكس – 30 772 تەڭگە.

بيلەتتەردى bilet.railways.kz رەسمي سايتىنان نەمەسە تەمىرجول ۆوكزالدارىنىڭ كاسسالارىنان ساتىپ الۋعا بولادى.

وقۋشىلار قىسقى كانيكۋلعا شىعادى.

قازاقستانداعى 1–11 سىنىپ وقۋشىلارى قىسقى دەمالىسقا 29 جەلتوقساننان 7 قاڭتارعا دەيىن شىعادى. 8 قاڭتاردا ولار ۇشىنشى توقسانداعى ساباقتارىنا قايتا ورالادى.

قوسىمشا دەمالىس بىرىنشى سىنىپ وقۋشىلارىنا قاراستىرىلعان: ولار ۇشىن 9–15 اقپان ارالىعىندا قوسىمشا تاعى بىر اپتا قىسقى كانيكۋل بولادى.

ال كوكتەمدە بارلىق وقۋشى 19–29 ناۋرىز ارالىعىندا دەمالادى.

الماتىلىق "قايرات" "وليمپياكوسقا" قارسى وينايدى.

سەيسەنبى, 9 جەلتوقساندا الماتىلىق "قايرات" كلۋبى ۋەفا چەمپيوندار ليگاسىنىڭ جالپى كەزەڭىندەگى وز الاڭىنداعى ماتچىن گرەكتىڭ "وليمپياكوس" كومانداسىنا قارسى وتكىزەدى.

الايدا اۋا رايىنىڭ كۇردەلى جاعدايىنا بايلانىستى بۇل كەزدەسۋ, سونداي-اق بەلьگييالىق "بريۋگگە" كلۋبىنا قارسى ماتچى دە الماتىدا ەمەس, "استانا ارەنادا" وتەدى. مۇنداي شەشىم ۋەفا-مەن بىرلەسىپ قابىلدانعان.

ويىننىڭ باستالۋى – استانا ۋاقىتىمەن كەشكى 20:30 دەپ بەلگىلەنىپ وتىر. 

ەلەنا رىباكينا ۇندىستانداعى تۋرنيرگە قاتىسادى.

قازاقستاندىق تەننيسشى ەلەنا رىباكينا ۇندىستاننىڭ بانگالور قالاسىندا وتەتىن World Tennis League كورمە تۋرنيرىنە قاتىسادى. جارىس 17–20 جەلتوقسان ارالىعىندا وتەدى.

ايەلدەر اراسىندا يسپانييادان پاۋلا بادوسا, ۋكراينادان مارتا كوستيۋك, پولьشا تەننيسشىسى ماگدا لينەتت جانە بىرقاتار ۇندى سپورتشىلارىنىڭ دا قاتىساتىنى حابارلانعان.

جاڭا كومپانييالارعا ارنالعان ەلەكتر ەنەرگيياسى تاريفتەرى كۇشىنە ەنەدى

1 جەلتوقساننان باستاپ قازاقستاندا ەلەكتر ەنەرگيياسىنا ارنالعان جاڭارتىلعان شەكتى تاريفتەر كۇشىنە ەنەدى. ەنەرگەتيكا مينيسترلىگى قولدانىستاعى بۇيرىققا وزگەرىستەر ەنگىزىپ, وندىرۋشىلەر تىزىمىنە ۇش جاڭا كومپانييانى قوستى:

«Sintra Energy» جشس,

«KAZ GREEN ENERGY» جشس,

«Aktobe Energy Gaz» جشس.

بۇل ستانتسييالار ۇشىن الداعى جىلعا جوسپارلانعان ەلەكتر ەنەرگيياسىن وندىرۋ شىعىندارى نەگىزىندە شەكتى تاريفتەر بەلگىلەنەدى.

ۆەدومستۆونىڭ مالىمەتىنشە, نارىققا جاڭا كومپانييانىڭ كەلۋى بىرتۇتاس ساتىپ الۋشى ۇشىن ەلەكتر ەنەرگيياسىنىڭ ورتاشا باعاسىنا اسەر ەتپەيدى. سەبەبى بۇل كومپانييالاردىڭ گەنەراتسييا كولەمى سالىستىرمالى تۇردە از بولادى, سوندىقتان جالپى ساتىپ الۋ قۇنىنا ايتارلىقتاي ىقپال ەتپەيدى.

دوللار جەلتوقساندا قايتا قىمباتتاۋى مۇمكىن.

كوپتەگەن قارجى ساراپشىلارى جىلدىڭ اياعىنا قاراي, جاڭا جىل قارساڭىندا, تەڭگە سال السىرەپ, دوللاردىڭ پوزيتسيياسى قايتا كۇشەيۋى مۇمكىن دەگەن پىكىردە ەكەندەرىن جەتكىزدى.

ماسەلەن, قارجىگەر جانە بۇرىنعى بانكير سۇلتان ەلەمەسوۆ جىلدىڭ اياعىنا تامان دوللار باعامى 540-قا دەيىن كوتەرىلەدى دەپ بولجادى: 

"قاراشا ايىندا تەڭگەنىڭ نىعايۋى جالپى كۇتكەن نارسە ەدى. كوپتەگەن اناليتيكتەر مۇنى بولجاعان ەدى. ال جىل اياعىندا نە بولادى? مىسالى, Halyk Finance, قاتەلەسپەسەم جىلدىڭ اياعىندا دوللارعا 550–560 تەڭگە دەپ بولجام ايتىپ ەدى. وز باسىم ونداي قاتتى پەسسيميست ەمەسپىن. مەنىڭ ويىمشا, جىل اياعىنا 535–540 تەڭگە ارالىعىنداعى باعامدى كورەمىز", – دەيدى ساراپشى.

ياعني ساراپشىلار تەڭگە ۇشىن اسا كۇردەلى ستسەناريي بولجاماسا دا, دوللاردىڭ بەلگىلى بىر دەڭگەيدە قىمباتتاۋ ىقتيمالدىعىن جوققا شىعارمايدى.