Jeltoqsan köşesinde BRT (Bus Rapid Transit) jelisiniñ iske qosıluına baylanıstı qozğalıstı wyımdastırudıñ jaña sızbası engiziledi, dep habarlaydı Shalqar.kz Almatı äkimdigine silteme jasap.

Almatı äkimdiginiñ mälimetinşe, wzındığı 4,6 şaqırım bolatın jaña jeli Timiryazev köşesindegi qoldanıstağı BRT uçaskesi men Rayımbek batır dañğılı boyında salınıp jatqan aumaqtı jalğap, oñtüstikten soltüstikke qaray üzdiksiz jıldam avtobus qatınasın qamtamasız etedi.

— Jürgizuşiler jol erejelerin qatañ saqtap, joldağı tañbalar men belgilerge mwqiyat nazar audaruı qajet. Bwl aumaqta qwqıqbwzuşılıqtı baqılauğa alatın foto jäne beyne tirkeu jüyeleri de jwmıs isteydi, — delingen habarlamada.

Joba ayasında arnayı jolaqtar jol boyınıñ şetinde ornalastırılğan. Mwnday şeşim twraqta twrğan kölikter men keptelisten bolatın qolaysızdıqtardı azaytuğa mümkindik beredi. Soltüstik bağıtqa qozğalğanda bölingen jolaq köşeniñ oñ jağında, al keri bağıtta sol jağında sızılğan. Jeke avtokölikter üşin Abay dañğılınan soltüstikke qaray bwrınğıday birjaqtı qozğalıs tärtibi jäne jolaq sanı saqtaladı.

Jaña bağıttar boyınşa avtobustar 14 jeltoqsannan bastap eki bağıtta da qatınay bastaydı. Alğaşqı kezeñde № 92 jäne № 59 marşruttarın iske qosu josparlanıp otır.

— Marşruttardıñ naqtı sızbası men qozğalıs kestesi keyinirek jariyalanadı. Ayta keterligi, joba ayasında barlıq jolauşığa qolaylı boluı üşin arnayı köteriñki platforması bar zamanaui ayaldama keşenderi ornatıldı. Sonımen qatar eki qabat asfal't töselip, bağdarşamdar, jol belgileri, jarıqtandıru jüyesi jañartılıp, trotuar plitkaları arqılı jürginşiler aymağı köriktendirildi, — dep habarladı Almatı äkimdigi.